Sunnung khat class
off neih ziakin Sonmung tuh College
Library ah net surf
dingin
diang lut zual hi. Rule toh kituak
a dakkal khat tuzou, a facebook
account log out dinga a kisak toh kiton in,“Hahahaha….hiai pa
facebook ah
ka muta….” chih in hong kichat keuh hi. Class
kipat nawn hun ahihman in liing
pepep kawm in Sonmung in “Hahaha…bye phot…Ka
out...” chih teng
in dawng man hamham hi. A lamet phak louh, phetlou a mangmat
phaklouh a Thianhoih in a chat guih mawk pen kipak lua hina zenpi
lamdang sakna in a dimta hi. Class ah vatel nawn mahleh Sonmung tuh
bangmah ngaikhe ding a hikei hi. A siamsinna sunzom dinga
Shillong a tung chil apat in Sonmung in numei naupang mahmah lai khat
hawigu giugiau hi. Himahleh kuamah kiang a gen ngei kei. A numei
gamtat-khohei teng ana enzui toutou ahihna ah Sonmung in tua nu pen
mihoih mahmah dingin ngaihsun hi. A theihna tan ah leng adik bok-Amah nu
pen kua dang hilou in Thianhoih ahi hi. Sawt apat ana deih gige,lah a
gen ngam ngeilouh Thianhoih in facebook a message
a
khak ni apat niteng phial a kithuzak tou zel uh ahihman in Sonmung leng facebook
a addict loh hial hi. A log
in teng
a Thianhoih’ message
om
gige a, kamsiam tak a houpih tiautiau ahihman in Sonmung’ lungsim teng tuh Thianhoih in
bangmah lou kal in a luah tlat ta mai ahi.
Himahleh a kithuzak ma pek ua
pat hoihsa a deih ahihlam Sonmung in bangmah gen ngeilou ahihman
in Thianhoih in hiailam bangmah a
theihpih kei. Itna siktui pal
taktak ding tuh a hita mai. America a siamna sin a a omlai a Heutupa
(L) Jamkhothang in: “…Sinlai
ah vung den Lai
ah vung hounem na vang ngai ing…”
Ana chih hial. Hiai ah VUNG
chih
thumal Heutupa’n a zang dik mahmah.Thaam den a om den
maimah ahih chiang in VUNG chih mah a dik pen hi. Tuamah bang in
Sonmung’ lungsim ah leng Thianhoih tuh a vung den ta mai hi. Thianhoih tuh naupang hoih
tak ahi a, a nu-le-pa’ tanu neihsun, hawmthoh leh duat ahi hi. A
pa Shillong a sem, Officer lian
mahmah ahi a, a innkuan un hiai ah a
khosa lel uh. A pa Saptuam Upa ahih dungzui in Khristian Innkuan diktak
ahi ua, niteng a Innkuan Maitaam dohzou gige te ahi uh. A nu leng
sepna neikei mahleh mi laisiam ahi a, saptuam leh khotang a nu etton tham
ching khat ahi hi. Thianhoih pen high school
kailai,Pawl
Kua(9) zil lel ahi. A unau un lehkha sim a taima ua, siam leng a siam uh.
Naupang hoih chih mahtak a nu toh lou in koimah ah muhkhak ahi
ngeikei. Insung khosakna, Innteen-louteen ah kuamah eng dingte a hikei
ua, mite’n amau khosakna a engzaw uh. Thianhoih misia a hikei
chih haih vuallouh ahih bang in pasal tam tak leng Sonmung toh mit
kibang a om uh. Mi nuamsa ahi ua, duhduh ne a deih deih nei
zoute himah le uh a mel uah kisaktheihna himhim a belh kei. A kamsiam
ua, miteng a kibang in siamtak in houpih thei uhi. Tuaziak mah
in, beh-le-phung mi hau mah le uh ngainatu leh tanau chih vek
theih ding midang leng a hau mahmah uhi.
Thianhoih in a Inn ua
pat facebook tungtawn in chat
zel
mahleh Sonmung in zaw amah neihsa in
a daihlouh-lawmte’ mobile phone apat khawng in Thianhoih’ message-te dawng
ding leltak in a log in sek. Lawm muan khat-le-nih guide
book banga a zat a om ua, Sonmung in Thianhoih a ngaih
dan amau kiang a kum zel hi. Ahitak in neih-le-lam, hauhna ziaka
Sonmung in Thianhoih deihta ahikei a, a it leh a deih Thianhoih pen
mi nuamsa, neizou leh kuamah englou innkuan apan hi kha ana hizaw
hi. Facebook ah kifriend khin himah le uh Thianhoih in contact
zenzen
kei leh a itna mei hiai bang a kuang ding leng ahi samkei,
gen ngamlouh a Sonmung in beisak mai ding ahi hi. Kinem lou,
chikmah a amah toh kithei a kihou ding a leng kilam-en lou himhim ahih
ziak in. A lehlam ah Sonmung ahihleh
Shillong a College hoih pen
khat ah Second
Year sin lel ahi. A pa Government Teacher ahi a, a
nu ahihleh mahni ading khop A,AW,B,CH
gelh
thei a simthei liailiai ahi hi.
Mi bang a hatzou hikei mahle uh
a Pu leh a Pa Saptuam Upa ahih dungzui un niteng a Innkuan kikhopna
nei gige ahih ban uah a Ute leng saptuam leh khotang a kizang ahihman
un Sonmung in leng biakna a limsak a, dam ahih liai nak leh kikhop
ding thulh ngeilou hi. Mi chitak ahi a, tulai khovel siatna tep-le-muam,
nek-le-dawn hoihloute apan kikem siangthou vilvel a mahni kithunun mi
ahi. A kipatna leh a dinmun theichian lua ahihman in kingainiamtak in
lawm-le-vual polhna ah gamtat-khohei a pilvang mahmah. A neu apat
lehkha lam ah mi’ nuai ah om zen lou in amah ading khop a hihthei
mahmah thou. Khut nasep leng a taima mahmah a, pawl Sawm(10) a zoh nung suti
a
neih chiang in nasem a kiloh in,a sum muhte a nu a kemsak zel
hi.
Hiai a College hoihpi ah admission amuh hang in tanau nai,
beh-le-phung mi belh ding neilou a lungbuai takin om mahleh hamphat huai
tak in Hostel hoih mahmah khat ah admission
mu
zenzen a, huai a om a sinna maban zom thei lel ahi hi. Mite’ neih bang neilou a, mi’
silh-le-ten bang nei zoulou kisa in mi lak a kihel a, biakinn kai ding a
kihtaak vungvung hun a tam mahmah. Himahleh, “Mi
eng ding chi leng khovel ah eng senglouh a dim in a om;
Silh-le-ten a mi toh kidem dia ka pate’n hiai a hon sawl uh hikei ve
aw…” chi in kilungkim sak thei zel hi. Mizahkai ahih bang in Sonmung
tuh mi lak ah leng a kihel tam kei a, nuam leng a sakei. Shillong a
sawt om nailou ahihman in a om lui zaw, kikhotual
sak a group om khenkhat a theih ziak in khotang vaai a kidiah lou ahi zaw. Ban ah, thil
khat peuh ah ‘hiai pa ka huai ahi; huai pa ka hiai
ahi’ chi a kuamah minloh ding a neihlouh ziak leng ahi hi.Tuaziak in amah mi neilou leh tanau
neilou pen-utlouh ziak hilou in-khotang
vai ah kihel tam lou mah ahi.
Huchibang ahi a, mi’ tanu duat
Thianhoih toh kitheih maimai leng amah a
kizumpih khin hi. Thianhoih mi nuamsa, kuamah englou ahih ban ah a
lawm polhte leng Officer lian
taktak te’ tate ngen ahi zomah uhi.
Khopi lian dangte dan a hiai bang Elite Class a numei khat toh sakmel mu a
houlung kup ding zaw Sonmung’ ading in kinep vual ahikei. Hichibang
a dinmun kikhai himah le uh HAUHNA ziak hilou in, Sonmung in a
itna tengteng Thianhoih a pe khinta. Hun sawt paita apat Thianhoih’
nungchang a theihsa leh a theih beh zelzelte in Thianhoih ah a lungtang MUAN
a
sawm ta mai hi. A MUAN bang ngei in a ginom in a chitak
ding chih leng theihsa ahi. Amah kipiak hoih ziaka deih bang a thil pai
dinga ngaihsun ahi phot peuhmah. Thianhoih lou ngal kuamah it a ngai
thei nawnlou ding bang in a kikoih hial hi. Himahleh hiai tan ah leng
Sonmung in a itna thu kammal khat leng a theisak ngam naikei. Tuaziak
mah in bangchi tuk in ngai in deihta mahleh a itna a thei dia kilawm pen
Thianhoih in a thei naikei. Niteng phial in facebook
tungtawn
in kithuzak tou ua,Thianhoih’message
te
khat lel leng dawng louh in Sonmung in a koih ngeikei. Online
ton
gige lou; College Library leh
lawmte’ phone zang zen a kicontact
guigui buaihuai a sa simta hi.
A phone number deih mahleh ngen ngam tuanlou a; a
langkhat ah lah phone leng tawi
di’n a gingta naikei zel. Kha khat
ding bang hong kihou touh nung un kamsiam lou sasa in Sonmung in a phone
number hon ngen ta hi. A nget nung ni nih bang khatnu facebook
khoihlou
in hong om chet a, Sonmung’ lungsim ah zumna a pumdim ta: hon pe
nuamlou hi di eive chih ngaihtuahna in. A dawnna ding ngak a log
in zihzeh
ahihman in sunnung khat tuh College Library
apat
a log in leh Thianhoih’ message
saulou
ana om liuhleuh a, number
digit sawm ching geih khat ana kigelh hi. Bangmah dang hih
nawnlou in tua number
kintak
in a phone ah save in a facebook
a
log out ngal. Tai pawt chenchen in a lawm hoih mahmah khat kiang ah thil omdan kipaktak in a hilh ngal hi. Class
ah
tu in; koi ah hoh in bangteng hih ta leh Thianhoih kia in a
lungsim a luah suak ta! Tu’n zaw facebook leng ngai nawnlou in a phone-Hello
chih
toh message kikhak theihna maimaiapat in a Lungdeihnu thuzak theita
hi.
Ahihziakin Thianhoih naupang lai ahihman in a nute’n a theih
ding uh utlou hi’nteh, a hithei tan a call lou hamham ding in a ngen hi.
Nuamsa mahmah a facebook leh phone tungtawn a hun bangtan hiam a
kithuzak nung un Nipini khat Biakna kikhop tawp chiang a Biakinn
kong a kimu ding in kidawp ta uhi. A ni hong tung petmah ta a, mipi
kikhop tawp in naupang lamte leng hong tawp uhi. Mi teng pai beikhin
simta chih in Thianhoih tuh a lawm numei khat toh daai ning ah na ding
tittet uhi. A kiang a pai pah a sawtpi omkhawm ut lua himahleh
Sonmung in naih zok ngamlou in gaal-et nilouh hi. A tawp in diip phu kinoh
zen in a va naih phei ta hi. Kimaituah a hong kimuh hial tak un Sonmung tuh
gen ding pen theilou in a mittang bang a lang-lang en in tai zualzual
mai hi. Mi apai nailou om sunte tam kei mah le uh Sonmung’ mit ah mipi
sang a sim bang mai ahi uh. Thianhoih leng a pate’n car
a
pai ding a ngak uh ahihman in sawt om manlou in Sonmung a paikhe pah hi.
Piching khat
hi hial mahleh numei dang kuamah hiai bang a chhaih
kha
nailou leh houpih kha nailou ahihziak kia mai hilou in numei neizou tak a kichei
vitvet khat toh kihou ahihziak a Sonmung hichi thethu kha ahizaw hi.
“Kei
ka pian tualniam e, Ka vang zubang khumlou;
Tullel
dawn a heisa paal aw, Ke’n ko’ng lou zou diam??”
“Thian,
ka zum lua, himahleh no’n theihsiam ka gingta. Den a I
dingkhawm
lai hon mu om leh a hehthei a om diam chi ka hi…” chi in a nung sawtlou in Sonmung in message
khak
ngal hi. “Om maithei mawle??
Poilou pi, lawmta I vele; zumhuai mahmah kei…” chi in Thianhoih in a dawng thuk hi.
Hong kitext zom touh chiang un Sonmung in zeilou deuh mai in sawtpi apat it, deih leh ngai ahihdan hon genkhe khong hi. “Sorry,
you are late…” chih tuh a dawnna ahi meuh mai!! Facebook
a
Sonmung a contact ma zek a
tangval khat toh kingai khin ahihdan Thianhoih in siamtak
in a hilh hi. Zei tak zaw ahi. Naupang chih taklouh phone
ngial
le a tawita dia aw a chih khat in hiai bang dawnna a piak in Sonmung ngaihtuahna
tampi a pia hi. Ngai law khin ahihman in na sa law mahleh hihtheih
dang nei tuanlou ahihman in lamdangsakna in a dim zaw ta! Sonmung pen
amah’ vai ah late kisa
hetkei mahleh a Leenchil vangngaih’ ading in late
ahita.
Khopi naupang leh khopi lou deuh ate zaw kikhai deuh mah e chi in Tuikia
Beidot nuih a ngaita mai. Banglam peuh ah khopi naupangte ana advanced
deuh
mah uh hi inteh-phaklouh a himai ve ua-chih ngaihdan a
neisak. College a Selection Exam dia kisak laia hiai thu a zak
ziakin Sonmung tuh lehkha leng sim theilou in hun bangtan hiam sung zoi
niang zen in om hi. Hichibang a thil om ahihleh chi in Sonmung leng
mi’ relation kal a dongkholh pi a om nuamlou in a itna thu gen ngutngut
tuanlou in lawmte’ thuhilhna zui in hun dang a ngak ta. Vailak
zunthak lel bang tadih ding ahihman in., A numei pen hitheilou hi
mahleh Sonmung’ ading in Thianhoih tuh first
love a chihte uh ahihman in mangngilh phut ding thil baihlam a hikei hi. Kum hong thak a
hunte hong beitou zel in Sonmung leng Second Year
Exam zou suti zang
dingin Lenna Vangkhua zuan in Shillong a nuse phot hi. Sun chiang in nnasem
a kiloh in nitak chiang in a lawmte toh kiaam in pawt a tha-it
thei
mahmah hi. A khen chiang in tam deuh a pawt in, a khen chia’h lawmhoih
deuh khat toh amau gel kia a pawt hun uh leng a om. Huchih hunsung in
leng Thianhoih in a kallak ah text zel a, school
a
activity, programme tuamtuam a neihte uleh a result
te
leng a hilh toutou zel hi. Innlam a
lawmte’ tungtawn in mi tuamtuam toh hong kitheituah in Sonmung in tuh suti
nuamtak
in a zang hi. Huchi kawmkal ah hoh mun luat ziak leng
hilou tuanlou in leh; Thianhoih mangngilh theihna ding ahih khak leh chi
in Lia Ngaihlian toh hong kineel in hong kimaingal mahmah uhi. Academic
session kipat hun nawnta ahihman in Sonmung leng maban sunzom dia
a kiknawn hong hunta hi.
Sawtlou sungin a kal uah Itna
chi hong kituh in bangchi chi hiam in hong kingai kha uhi. Sonmung’ ading in suti
kha
nih hial himahleh hun tomchik sung a bang ta mai. Koimun peuh ah
om mahleh uh ginom gige ding
a kichiam in Sonmung in khelah tak in
Ngaihlian’siamsinna mun Lamka a nuse nawnta. Hun leh nite bangmahlou kal
in hong bei tou tou a, amau leng ki-it tak leh kingai tak in khualgam
apat
in itna simthu kikum tou zel uhi. A hithei tan a kuamah toh
kisukbuai louh sawm in ginom tak a pang dingin kithutuak uhi. Khovel kikhek
zihzeh lak ah tung sunni leng a suah ngei ngei in suak gige samlou a, khoniim
toh a suah hun bang leng om thou hi. Thil paidan kibang gige lou
ahihna ah Ngaihlian omdan nidang toh kibang nawnlou sa in Sonmung in
Innlam a lawmte thil omdan ana enkai dingin hilh hi. Ni bangzah hiam
nungin Ngaihlian’ facebook password a ngen a; se leh-pha leh a
ngaihzawngpa’n ngen ahihman in a nial thei hauh kei. A message
te leh thil dang teng a check sak vek a,
‘tangval zum theilou taktak khovel ah tam na
maizen e!’ chi in Sonmung tuh a hehtha a suak mahmah. Pasal khenkhat awng
nawnlou chi a dawnna a piakte kipahpih kawm in khenkhat a dawng dan
lungkim lou ahihdan Ngaihlian a hilh hi. Khenkhat a block
sak zawmah lai hi. Tua teng genlouh Ngaihlian toh a lawmnu kihouna a sim pen in a
lungtang a na sak mahmah a, thil omdan chiangtak a gen dingin ngen
mahleh a gen utlouh ziakin kikhen ding a chita hi.
Tulai mite’n zaw serious
lak
kei maithei uh, himahleh mahni sapum kikem siangthou Tangval
Sonmung bangbangte’ ading in thil.. koihdap chi ahi kei. Buaitak
a omlai Ngaihlian in ngaihdam ngen a maban a hichibang thil hih nawnlou
ding a chih ziakin kikhenlou in kingai kik thei nawn uhi. Ngaihlian leng
kikheng mahmah a, a UMung’ ading in a hun, lungsim , message
pack leh phone balance tengteng a
zang chih theih a hita mai. A hihsa bangin
zingkal a thoh teng in a UMung wish mangngilh ngeilou a,
school kai a kuan ding chiang, tawp chiang leh nitak laisim khin a lup ding
chiang in text zel hi.
Huchi lou in a hun neih dandan un a kitext
den
uh. Huchi’n Sonmung in leng a ngaihna hong lian deuhdeuh a, innlam painawn
ding kal a ngaklah mahmah mai. Hoih tou phot na inteh chi a
lungmuang tak a khovel a hon zat lai in nitak khat Innlam a lawmpa
khat in Sonmung hon call guih hi.
Thu tuamtuam gen a houlim kawm in
a lawmpa’n thil khat hon gen a, tua in Sonmung’ lungtang a vut
mahmah. ‘’ Lawm ,thil kana kansui chiang in zanlam
a Ngaihlian toh na kinakna uh kinakna tham mah ahi. Mi poisak neilou
tam lawta ahi in, Ngaihlian toh na kingaih ma un I lawm mahmahM khat
in kingai leng hi hial lou in sam khia khia thei mawk ve o…” chi in detail
report a pia hi. Zing khua hong vak a, thil omdan Sonmung in awl awl in Ngaihlian kiang gen
hi. Nungak-tangval toh kisai thupil in Numei pen
a hun paisa ki-en a; Pasal pen a mailam hun ding ki-en ana chih\ Sonmung in hah zat lua zong
hikha maithei. Kawmthawi lua a mi’
kellu phum
teng
va pholh kha leng hikha mah inteh-Pilvang khengval. It louh ziak leh ngaihlouh ziak hilou
in, a thuzak ziakin Sonmung in ngaihdam nawn ding hithei salou in
gibang khen ding simthu a hon lelta mai hi. Sonmung’ mizia theisuak man
thou ahihman in kikhen ding Ngaihlian in a ngai ngam kei a, mittui
luang a kap zen in kikhenlou dingin ngen mahleh Sonmung tuh a thupukna
sa a tolh ding ahi nawnkei hi. A kingaih sung un Nungak nou
Thianhoih kichi ana deih luat lam bangmah a gen kei a,
Thianhoih toh a vangkim in kithuzak zel mahle uh Sonmung in a ngaihzawng
neih lam a hilh ngeikei. Hilh leh leng bangmah poi di a hi tuan
samkei.
A zingthoh chiang bang in
Ngaihlian’ message om ding sa
in a phone en zel mahleh a om nawnta
kei. Thawmhau kisa in mahni kisuklim na’ng zong in mun tuamtuam a hoh
in, lawm leng pawl tam zaw in Sonmung in hun a hon zang tou hi. Kuamah
toh leng kithuzak khollou a om in, Thianhoih mah a lungsim ah om
mahleh lawm dang ngaih neisa ahihman in va text
mawkmawk
lou hi. Kha nih vel ding nung in nitak khat Thianhoih in Sonmung text
a,
a lawmpa toh kikhen uh ahihdan a hilh hi. “Poi na e maw…”
chi
in gen ding dang thei tuanlou in om hi. Deih lua hi mahleh kipahhuai na e chih ding in
mi lungleng pi hikha thei ahih na ah, poi na e chi mahleh a lungsim guuk in
kipahna khat a nei zel-awng chih hilh
a hih chia. A masa a dan in kicontact tou nawn
ua, nidang sang mah a leng kinai zaw in thil hong kikum
ta uhi. Hita mahleh Sonmung in a Itdan leh a deih lam bangmah a gen dawk
nawnkei: a theihsa chih ngaihdan a neih ziakin. Thianhoih in a
puakgik leh a buainate gen in kishare tuah ua, Sonmung in leng a hih theih
dandan in panpih tou zel hi. Hiai tan in facebook
leh
phone tungtawn a akitheih nung uh kum khat a
ching ta. Puja
suti ni bangzah hiam hon nei tuak ua, huai suti
sung
mah a SSPP Annual
Sports om ahihman in Sonmung tuh kumdang banglou in Sports ah kihel in, item
tuamtuam
ah kimawl ta hi. Hiai hunte a Thianhoih leng sports
a
hoh zel ahihman in mite dan in tutkhawmpih in kizuihpih ngamkei mahleh Sonmung in nuam a sa
tuan mahmah chih Thianhoih in leng a phawk pih sam hi.
Kingai bel hilou, kihua leng
hisam lou in huchi bang a kiclose tak a omlai Sonmung’ lawm,a kinaihpih
mahmah ban ah Thianhoih toh a tanchin uh a theisa khat in facebook
tungtawn
mah in Thianhoih ana contact
tageet
hi. Hiai leng Thianhoih in a hilh ahi a, a thil gente leh a thilhihte leng a hilh zel.
Himahleh Sonmung bangmah theilou bang in dai dide in a om. A zei tuak mah
uh zaw h’inteh; progress a hat
mahmah mai. Mel et a hoih zaw, fel
zaw, pilzaw, hau zaw leh siam zaw khat hong kigolh ahihna ah, midanglou,
lawmta kal a nuam saklouhna a neih ziakin hiai bangin Sonmung in
Thianhoih message a khak ta
hi:
“Thian,
na hon thil gen lamdang kasa a, Na tung ah bangmah gen theihna
ding power nei
hikei mah leng lawmta kal a hichibang thil nuam
kasak louh ziakin kei pen na kal thu uah ka hong kidiah dah ding.
Kuamah mohsak ding leng ko’n neikei. Tu in a deihhuai zaw leh
na lungtun zawk na di lawmpa a omta, huaiziakin, kei lou a hinkhua nuamzaw
na zat ka lam-en. Hun hiai tan nang toh I kithuahna ah, na deihlouh
leh na zakdah ding thil kana gen khak leh kana hihkhak tengteng
na hon ngaihdam ka hon ngen. Na U bang a na hon et a, na hon
muanna teng ziakin leng kipahthu ka hon gen. Na sinlai maban ah
Pathian’ piina toh na lamzang touh ko’n deihsak. Pathian in pha A
sak leh tunung I damsung in I kituah khak nawn ka lam-en. Mangpha”
Vasa leng lai a neitu omlou
ahih lai a Sonmung pen Thianhoih a kineihsak luat pen thil dik
ahi sam kei. Kingai tuah ahihlouh hang un Sonmung in ngai lua
ahihman in hiai message thot khiak
tuh thil namai ahikei hi.
Thianhoih in lawmbang lel a en ahihtak leh leng lawm ginom leh muanhuai
khat mansuah a hita phot peuhmah hi. Numei tuamtuam toh
kithuah in kineel mahleh Thianhoih bang a lungkuai a zou Sonmung in a
mukei. Amah it bang in Thianhoih in it kei maithei, a ngaih
bang in ngai kei maithei; himahleh Sonmung’ ading in Thianhoih
khup zou ding a omkei. Lianu dang teng sangin Sonmung’ ading in
zaw Thianhoih mah a CHING pen ahi a, mangngilh ding sawm
leh leng a mangngilh zoh vuallouh ITNA a piak khit tak ziakin
Thianhoih pen mah a CHING pen ahi gige lai ding.
*Hiai tangthu a Min leh thil
dangte kiminlohte a kilatawm ahi a; nang toh kituak kha na hih leh
leng nang’ tanchin thei a kigelh hilou ahi chi a na hon theihsiam ka hon ngen.(C)Copyright
0 comments:
Post a Comment