Sunday, April 7, 2013 at 9:27am
Exodus: 20:5 na ah, i biak pa Pathian, thikthusia, a mah deih loh dana omte, suan thum suan li tan a gawt ut pa a hihdan i mua, chang 6 na ah, i et nawn leh, a mah iit a, amah nung zuia, ama deihdan a omte tung ah bel khang sangkhat dawng a avual zawlna pe ut pa ahihdan imu nawn hi. Thukhunlui hun apat in leng Pathian, zahtak nam te lamzan dan leh a vualzawl na atan te uh chiang tak in i muthei a. Amah thu lim saklou nam te sang a a thupi zok dan uh leng i muthei hi.
A guh lang in gen mai le’ng, ei Paite te lak ah, Kristianna hong lut tung in, ki thuutuak takin i-na sangpah thei kei ua, mi/khua bangzah hiam te’n kipak taka ana vaidawn lai un, mi/khua bangzah hiam te’n, zu leh sa nek topsan nuam lou in, dawi leh kau, singbul, suangbul biakna topsan nuam lo in, Kristianna leng limsak lawm lawm lou uh hi. Huaiziak a Pathian thangpaihna eite tung a tung lai ahi diam? Chihbang ngaihtuahna ah a omlou thei kei. Bangziak in? I nam in i masawn theih louh dan te, thu khat, laa khat neia, tu hun tan a i paithei nailou chih khong i theichiat uh.
Ka lawmte khat in hichi’n hon hilh a, “Manipur singtang khua khat (Paite siang ten-na) ah tuh, Kristianna hong lut tung in, khokiim khokiang te’n Krist Jesu hondampa ding in ki thutuak tak in a sang pah thei ua, himah leh hiai khua a teng te’n sang nuamlo uh hi, Missionary khat in, “hiai khua kum bangzah hiam nung in a kho-mang lai ding” a chia, sun tanglai khong bang in kuamah muhding leng a om nawn kei uh, inn tamlou chik a omta uh” chi’n gen hi. Pathian thangpaihna , Missoinary pa thugen bang a tangtung dek ahi thei diam? (hiai khua theikha hiam, akhua mi ina omkha ahih a leh na theihsiam na uh ka hawn ngen)
Ole! Huai hunlai a a hih diklouh uh chu, kisikin, boldik sawm mah lehang ei mihing lam ah, bangmah phat tuamna nei di’n a gintak huai kei. Hiai thua ah zaw kibol hoih thak ngai in le ka thei kei. 100% Kristian i hita. Toupa min phatin om henla!! Hun paisa a i thil hihkhelh te ziak in,tuni tana muh di leh san di tampi ina chan ta le ahi maithei. Himah leh tuni apat a kibolthak a, Pathian deihdan dungzui a i khosaka, i vaihom dan leh i ki vai puak dan te Pathian thu dungzui ahih in chu, a let sangtamtak Pathian apat muhdi ineilai ahi chih gingta chiat leng deih huia mah mah ding hi.
Galatia-te 3:13 na ah bangchin a gen a i chih leh, “Krist in eite sika hamsia teng teng thuak in, dan hamsiatna apan in eite ahong tankheta” chih imu. Huai ziak in ki ngai-se mailou in, Kristian-na ki thutuak tak a ina pomlouh ziak uh eive, Pathian thangpaihna eite tung ah hong tungta ei, chia i ngaihtuahna paisual te pen, ngaihdama omta i hi chih thei a, hun paisa a hihkhial i hi chihte mangilh in, tuni tan in Pathian in eite a di’n bang bang a hon hihsak a, bang a honpia chih lam ngaihtuah zaw ni.
Maban sawnthei a, dinmun sangzaw dingthei ding hina-pi’n, i ngaihtuahna diklou te ziak in i lampi ding hondal lel zaw ahi chih thei len’ng, “Huchi’n tapa in sala pata honsuahtaksak leh, na suakta petmah ding uh” achih kha.
Pathian in thil lamdang tak tak ei te a dinga a hon hihsak te i mangilh mai ding uh ahikei, mailam hun a ding chia, dinmun sangzaw i lam-et na ziak in leng tuni tan a Pathian in ei Paite namte a honpina, tu dinmun a ahon koihna te i ngainep in, i musit ding uh ka chihna ahi zen zen kei. Makai tu hoih, mipil, misiam, gam-le-nam iit tu tamtak Pathian in ahon peta, athupi ngeimai. Himah leh makaitu ahih hang un, eite lungtun-na tan, i lametna tan ahon tungpih zoukei uh chih i thei, himah leh amaute zahtakna piak leh Pathian tunga kipahthu gen chu kuapeuh in i bat ahi chih thei chiat leng deih huai kasa. Amau te kho-ul, sisan, tha-le-zung ana sengsa te uh, ei khangthak te’n a thawn in i liamsak mai mai ding chih leng lauhuai mah mah hi. Amaute sepgimna zar zou-a, tuni hun a, nuamtawl in, Gam-le-nam veina, iitna lungsim neilou, semtu mai mai i hih ding leng lau huai mah mah ahi.
Ei Paite nam te a dinga, Pathian in thil lamdang leh thupi tak tak a hon hisak te i ngaihtuah ngei di-uam aw! Dawi leh kau, singbul suangbul bia a, tangtawn gawtmun a paidinglai, Missionary te phatuam ngaihna ziak in Jesu Krist i hondampa dingin i sang ta ua, ol-ol a masawn tou zel in, Namkhat chikhat, hon suangtu thumun i hihlam i theih nang un, sa-le-gal a hon neisak a. Haksa i tuahna te kia en lou in, haksa i tuah te khel a Pathian vualzawlna i tante leng i theih ki phamoh hi. Himah leh hiaitan ahonpi ta chia, om mai mai thei i hi nai kei, maban hun ah eite a dinga thil tamtak hihsak ding Pathian in neilai ahi chih kuapeuh in i theih a poimoh. Huaibang hon hihsak ding in, Paite te Pathian akimansa gige, himah leh Paite te i kiman nai kei ua, huaibang thil hihthei ding in Pathian lungtuak zawnga awmdan i siam kei ua, hun remchang i bolsak louh ziak lel ahi zaw.
A bik tak a ei Paite te gen i hih man in, Manipur hi’n Mizoram hita leh, namdang kumpi vaihomna nuai a teng ihi uh. Namdang te muhdan in chu nam niam leh nam neu chi’n a hawn mu maithei uh, adik, nam niam, nam neu chu i hi ngeimai uh. Himah leh namdang te hon muhdan mai mai in buai kei ni hang in, huaite ziak a lungkia a, mahni iki zumpih i hih in chu, nam thupi ihi ngei kei dia, huai phet lou in, Paite nam siamtu Pathian zahpih chihna ihi mai uh. Aziak bel, Pathian in nam tuam tuam, chi tuam tuam a bolte, leh a thilsiam khempeuh kibang veka a bol ahi, chih Laisiangthuo ah imu a, huaikia leng hilou in, mihing te bang chu(h) amah batpih a bol ihi chih leng imu. Huaiziak in Nam neu/niam a iki muh na in dinmun niam zaw a hon omsak thei ahi. Namdang in aneih theih, a hih theih uh, Paite te hih ziak a bang a hih theihlouh ding awm tuam??
I tup-le-ngim te hangsan tak a paisuak pih ngam makai tu hangsan i poimoh, huai bang mah in, makai te nung zui ngam chiat ding a, mipi lam leng i ki thutuah poimoh mah mah hi. I tup-le-ngim ah i lampi hon dangtu ding tamtak i tuak ngei ding uh. A hon sawisel ding ua, ahon vau ding ua, ahih kei leh kamsiam tak a khemkhiak a hon sawm a, lampi dang “na hamphat zoknang uh” chi a hon kokmuh ngei ding uh. Huai hun in, i siat nang deih tute gen dik sa-a, a thu uh ina oi khak ding leng lauhuai mah mah hi. “Ahimah ve, hiai zaw eia dia sang lua ahi, hih thei nai dah maini, denchiang in hun remchang dang a hon om zaw di” chi a, midang te paukam siamna lel ziak in, i tup-le-ngim te topsan belbul nawn kei ni hang in, hangsan tak in paisuak pih ngam in, “lohchin di leh lohsap di zaw Pathian khuta kinga ahi” chi ngam ta le’ng. I malakna, i lampi hon daltu te hatin pil mah le uh, eite i ki thutuah a Pathian i muang nakleh, i ki thutauhna te Pathian in mulou tuanlou ahi chih thei ni.
Midang te ziak a i tup-le-ngim i topsan pen Pathian deihdan leng hilou ahi, hangsan tak in, haksa leh gentheih na te i nam a di’n thuak ngam ham ham ni. Kei mimol ngaihdan mai mai in, Manipur ah 1997 in unau Thadou te tawh i buai ua, huai kia leng hilou, i mipil misiam om masa ding te a hon koih hoih sak zel ua, Mizoram lam ah leng PTC/PNC hat vanglai in, lam-et huai tak in i om ta ua, himah leh ina bohzui kei ua, a toptan ina tungpih ngam lou ziak a tubang dinmun a ding ibang kasa hi. Huai hunlai in bohzui in, haksa gentheih na thuak beh ngap in, “nam it tu, makai te, salpha te kho-ul, sisan, tha-le-zung a thawn in beisak mai keini” chi’n, lungsim khauhtak nei kawmin beizui hita le’ng, tua sang in leng i maban a limchi zaw ngei di’n a gintak huai.
Rome-te 11:29 na i et leh, Pathian in a vualzawlsa leh a gelsa te lak-kik theih a hih louh dan i mu hi. Huaiziak in a hi, eite leng Pathian vualzawlna tang a, dinmun sang zaw a dingthei ding napi, i sep sutzop peihlouh ziak in i lohsama, Mihing thil hihtheihna, thahatna apat a mudin iki kingaia. Bangkim hihthei Pathian in hon pe di ahi, chih lam ngaihtuah kha lou in. Hon pe ding pa mansa a om, eite ziak maha mulou a om ihi. Thil dang dang beisei in, alang alang ah i diang ua, bangmah sep busuah lah omlou. I theih khaklouh, poimoh mah mah khat a om, huai tuh, Pathian in bang hon hihsak ut a, bang dinmun tan hon tungsak ut ahia chih i namnul kha nak hi.
Tanchin hoih Johan Bung 4 na a Jesu leh Samari numei ki houpih dan, Jesu’n khantawn hin-na tui a gen lai in, numei nu’n bel, luikhuk thukdan leh, tui khaikhiak nang khau a omlouh thu in dawng hi.
Huan Israel te Aigupta saltanna a pata pikhe ding in Mosi a sam a, himahleh Mosi in amah samtu Pathian thil hihtheihna lam enlou in, ama mihing hinna lamkia a ngaihtuah a, ahih theih vual ahihlouh dan Pathian kiang ah gen hi.
Huaiziak in eite leng Pathian in, zalen tak a mahni a kivaihom thei ding a gam honpiak sawm leng himai thei, Huchih lai a eiten a diklou lam ngaihtuah a, mite sang a niamzaw, tawmzaw i hi, chih i ngaihtuah khak lauhuai mah mah hi. Israel te’n Kanan gam nawitui leh khuaizu luan-na a chih hial uh, luah dingin haksatna tampi ana palsuah uh chih i Bible ah imu. Pathian i honpe ding himah leh Direct tak in a honpe kei peuhmah ding, i makai te leh i misiam te hiam, Pathian mizat te hiam zang in a hon theisak dia, eite’n a diklama ina zat siam uh poimoh mah mah hi.
Tam i gensim ta. Himahleh gen lai di ka hi,,,,, kei leh kei dotna ka ki dong dia, a dawnna leng ken ka pe dia, kei leh lei kisel di ka hi.
Rome-te :Bung 3 na ah, soltak Paula in “ hon hih beidot sawm in, na thil hih tup, na hih theikei ding, a hon chi ua, himahleh, a hih leh mikhat gin-om kei leh bangchin ahih ta dia? Amau a gi-omlouh na un Pathian gin-omna amangsak dia hia”? chiin a dawng hi. A tunglam a i gensa mah bang in, eite siat khok salou, i malak na peuh hon dang sawm, paukam siam mai mai a khemkhiak hawn sawmte ziak a i tup leh i ngim te i paisuak pih theih louh hang in, i muh ding a tawm in a tamphah tuan kei, namte bolpa Pathian in Paite nam a bol tung a a muh di-ua a koihsa, a neih ding ua a koihsa a danglam tuan kei, ahun eite ziak a delay a hizaw.
Himahleh huai te mua, nei thei ding in tha leh zung lungsim tamtak i seng ngai ahi, huaibang a ihih peih kei un chu khovel omsung teng bangmah neih neilou in, kumpi dang vaihomna nuai ah kun in i hihna tak leng genkhe ngamlou in i om dia, a maipha uh zawng in, alang alang ah i vakvai mai ding uh chih lau huai mah mah hi.
I hun paisate a dik hia diklou, chihlam ngaihtuah in i hun manpha tak tak te uh i zang bei mai mai nawnkei ding uh. I hun paisa te’n i mailam hunding bangmah a hih lamdang tuan kei a, i pi-le-pu te koi mun a hong kipan ahi ua, kua a ei hon suang tu chih lam ngaihtuah a poimoh rual rual in, huai sanga poimoh zaw chu, i hun hong paizel ding ah bangchibang a pan lak ding ahia chih ngaihtuah a, i tu i ta te bangchi’n Kumpi dang vaihom na nuai a pan in i suakta sak thei dia chih te i ngaih tuah a, huai i ngaihtuah na te tangtun sak pen poimoh zaw ahi chih i theih deih huai mah mah ding hi. Bang lauh ding a om a, bang ziak a masawn ngamlou ding khopa doilok i hia? Bangkim neitu, danglam ngeilou Pathian nei Nam i hi kei a hia? Tuni tan i Nam a omlai a, i thil nget leh phut te i lohsam ua, kuamah ngaihsak leng loh zoulou in i omta. Lehlam ngaihtuah in chu a beidot huai petmah, himah leh huai thilte ziak in i sihlawh kei a, Nam mang leng i hinai hial sam a maw! “Paite ka hi” kichingam mi tampi i omlai, a thupi ngei mai. Vual lel ding leh namdang te Zoh a omdia bol i hituan kei, Vuazohna leng eite a hi tei thou ahi. Hiai teng a i lungkim mai Pathian in hon phal lou ahi chih thei ni.
Kumpi dang vaihomna nuai a om i hih dan igenta a, i tenna gam neitu te a pang in, i nam a di’n nambing min in hamphatna banghiam i mu uh leng a hi maithei, bang lungsim neia hon pia uh ahia? Chih i ngaihtuah masak a deih huai mah mah. Thilpiak a hon piak ziak un eite hoih nang a deih lua uh ina sak pah pah khak ding lauhuai kasa, huai hamphatna honpiak te tungtawn in, i nambil lungsim neih uh, i pau-le-ham, i tawndan te nalhtak a hon zohsak sawm uh leng hi maithei ahi. Huaibang haksatna te i tuah ding mah a hi chia, lungsim khauhtak i neih theih a leh, vualzohna eia ahi ngei ding. Amau te ziak a i nam piang a, dingkhia a hi zen zen kei. Pathian in Nam tuam tuam a bol ziak a Nam khat a o mi hizaw.
Sam 30:5 na ah, “Mittui toh ihmu mah leng, zingkal in, kipahna ahon tun” ana chi hi. Huchi ahih leh tuhun i zatdan uh lungziin huai in, mangbat huai mah leh, lam-et ding bei ngawih ngawih hi’n ki thei mah le hang, i mailam hun ah, kipahna, zalen-na, i muh hun hong tung thou thou ding ahi. Bangchik hun in huai bang thilte i mu un i neithei ding ua, chih bel eite sepgim-na leh ki thutuahna tung a kinga ahi . Lungkham haksatna palsuah masa lou a kipahna in zaw sot daih tuanlou ahi. Ei tua om lel lel te a dingkia ngaihtuah thei i hikei, i tu-le-ta te laka i ham-le-pau, i tawndan a mangilh mai louh nang ua pan i lak leng kul mah mah ahi.
A topna pen ding in Gam enkhe tu mi 12 te lak a mi 2 Joshua leh Kaleb te kia vualzoh a ki gingta ua, midang 10 te a hih leh lunglel mah mah uh chih i Bible ah i mu, a lunglelh hang un mi 10 te’n leng a gam va etkhiak uh chu hoih a sa un a enlah mah mah mai ua, himah leh sa-le-gal nei a buaitaka om peihlou leng a hi maithei uh, suanlam tuam tuam bolin, a lunglel maimah uh hi. Huaiziak in gamdai ah Kum 40 veng veng vakvai in a om lawh uh hi. Himah leh Pathian in huai gam a chiamsa ahih man in mi 10 te lunglelh na ziak in pekei mah leh, khangthak te khut ah huai gam a piak ding thu a gen thou thou hi. Huchih lai in Pathian a muang ziak a lunglel mailou mi 2 te lak a khat Kaleb in bang a gen a i chih leh, “ Hiai tang ka Toupa’n a hon peta, hiai mun lou ah te’n ka ut kei, ka lungsim in a khiaklah mah hiai gam ahi, “ chi’n ana gen hi, Kaleb in Pathian a muang zohdan leh a kuhkal dan a chiang mah mah. Hiai bang a eite’n leng Pathian muan zohna leh kuhkal-na i neih in tuh, Pathian in gam ahon piak ding i mungei ding in a gintak huai hi.
Bible pansan a thu tamlou kon gen, deihthoh luat ziak leh ol-moh luat ziak a, a kheng a val a genkhak a om leh Pathian ngaihdamna ka ngen a, simtu deihthoh huai tak tak te ngaihdan lou lam ka genkhak a om a hih leh Noute ngaihdamna leng ka hon ngen ngal hi.
Pathian in a thu vualzawl ta hen.!!!!!!!!
0 comments:
Post a Comment