Guite Road tawn a Mizoram ka zinna ~~ - Songsawmlian Tonsing

Ka Nu’n bel hon phal law tel kei hi. Ka kilawp dan ka gen chiang bangin, va chim gawp niteh koimah a nang kia a khualzin khiale hingeiloupi, Nute ngai a na va guk kahkah khakding kalau zawdaihve chi’n hon

dawng hi. Va zin di bang hilechinle na lampai na di kon lauhsak hon chih behlap zel hi. Hon phalluat khollouh na ziak dangkhat hi a katheih tuh, inn a mahni khomkhom a nuamsa tak a ki om, Singtang/ Zoudawn lamah va zin leng nektheih chi tuamtuam deih bang a neek di omlou di, gilkial velvul khong a ka va omkhak di hon lauhsak ana hi hi. Lehlam tak ah ka Pa’n bel kazin di hoih honsakpih a, ahihziakin kei ngaihdan a pai

di’n zaleenna honpia hi. Genlai le, ka Nu’n; huai singtangdawn a nava zinsa’ngin, na U Siam in Delhi ah Christmas zangdi’n honsam hilou maw, huai ah vazin lechin nuam vasa zaw di neive honchi hi. Huchi’n

Delhi lenna ticket man di honpia ua, keile ticket la din kakisa hi. Ka gate kong ua Paupu Auto te ngak in ka ding hi. Deihbangin hong tai kin keihial a, (auto kha, i deihkin tata’ chiang a vang a vang , i poimohluat

khollouh chia lah om zihzeh a batna chiang om hi) huaisungin ka ngaihtuahna hong ki khek man a; huai mituam-namtuam te gam a va zinsangin , ka Pu ka Pa pianna gam leh khanletna mun ‘Zoudawn’ ,

laphuaksiamte’n laa a ana phuah nagam uh, zu-leh-va chi tuamtuamte omna mun, ka mit mahmah a kava muh ding sapna bang a ngai in huai a hoh katel zaw hi. Ka Pate’n ticket man dia honpiak uh ka pekik a, amaule

bangmah honkan nawn tuankei uhi.

Huchi’n tarik 16/12/11 sintawpni a dingin Lamka to Aizawl Tata Sumo ticket kala hi. Guite Road tawn a ka khualzinna masapen pan di’n kong kipan ta hi. Kawlbem, Mizoram a ka Paneu te omna vaphak ding

kasawm ahi. Zingdak 6 geih a kipatkhiat di chih himahleh Manipur timing banah Sapte’ thupil ‘Better late than never’ chih zui kahi ngei di ua, dak 7 vel in ka kipan kheta uhi. Kei a dingin Tata Sumo a katuan masak

napen hilou in Guite Road tawn a Mizoram a lut di te a katuan masak napen ahi hi. Aizawlte innkuan khat Lamka a a sungkuante uh veh a hong zin, a innlam uh zuan a kiklam toh Baktawngte tangval khat India

sepaih suti a pai khat toh katuang khawm uhi. Ka kilehbulh uh abang hi, a ziak bel amaute’n bel a innlam uh zuan hita ua, kei bel inn nusia a tanaute veh dia khualzin ka hi hi. Leivui a khu mahmah a, lampi leng

hoihlou lua kisa, kuak a kuak dekduk na bang, pot a a pottouhna bang tam in tam petmah hi. Gari kham chihte bang om lolou thepthup, a hoih lampang a lak di hia, a se lampang a lak di chihzaw simtute ngaihdan a

hi lel di. Guite Road i chihchih a poimohdan leh a minthan tukin hoih zoulou hi’n kamu a, Rev. L.Khamkholun in “ sial kai om kasakleh gari kai nahi leltak uh “, chi a agen kaphawk khia hi. Phaizaang mite’n

amau lampi hon khaktan chiang ua, i hinna lampi uh ahi chih theimah lehang awlmohna leh itna toh a zuun ding

mihing omlou phial mahbang hi. Kei ngaihtuahna gen maimai kahi a, nam leh gam it tungtuan bangzah hiam i om uh chihleng kahaih kei hi. Lungthul leh Mualnuam kawl[cliff] te bang thupi kasathei mahmah a, melmuh tongsaan a kamuh a thupi kasak mahmahte, ei gam a om ahihdan katheikhia hi. Songtal leh Khuanggin kikal gamla kasa mahmah hi. Manipur a khua nanungpen Sinzawl nitaklam dak 4 in katungua, huai a patin Sinai camp kigal muhthei hi. Dak 5 velin Manipur leh Mizoram kigamgitna Tuivai Lei katung uhi.

Mizoram nana tuh lampi ana hoihzaw a, mualtung lam manoh kahihziak mah uh adiam a bouruak bangle dangzot hi’n katheithei hi. Khua leng a mialta hi. Nitak dak 6 velin Khokawn ka luttou uhi. Mei/electric ana vak phingpheng pah mai a, lam nawl ah gari neu tamkhop mu hi’n kaki thei hi. Lamdang kasa maimah hi. Singtang dawn a hichi bang thilte om din kana ngaihtuah kha kei himhim hi. Khawdungsei katungua huai ah nitak an ka ne uh. Khodungsei tuh Khokawn sangin a khopi zaw a, Paite te omdia ka gintak keileh ana om uh ahi dia, Manipur a hong kipan nahihleh Zuu hon pawlou maw? chi a honna houpih bangzah veihiam katuak hi. Manipur akipante’n Zuu pozel uh hihtuak! Inn katunnung a katheih thakleh ka annek na uh mai a dawr ka Pute’ a ahihlam ka Pate’n honhilh ua, ka Pate Nite tamkhople huai kimlak a teng uh chih kaphawk hi. Ka tai zom zel ua zan dak 9 vel in Ngopa ka tung ua, ka Ni Ngaigoute inn ah giak di’n kapai hi. A zinga auto zonga kavak na ah, inn bangzah hiam ah kahoh kha a, a kamsiam un a hou nopthei mahmah uhi. Huchi in dak 7:30 in Kawlbem ka manawhta hi. Gammang a hoihthei mahmah a, lamkiang a manou sing leh hual sing liantaktakte bang a et tham mahmah uhi. Bangtan hiam katai nung un kawlbemte khomual katung ua, huai akipan taklam pang a i dak khiatleh gammang hoihtak Forestte a kiphah phei zenzon mai hi. A kallak ah Tlaizong pak kilawmtak hong pakkhia ka muhin katawl a dam sak zou hi. Ka Nuneu in honna dawn a, chibai kaki buk ua, ka auto hire man pia in auto pupa toh mangpha kikhak in, huchi’n amah taikik hi.

Ka kihahsiang khitin zing an ka ne ua, gimsim mahleng kisuhalh di chi’n a innsak ua mualtung lianlou khat ah kava khodak hi. Lungleeng sim kahi ngei dia, ka fone ah laa ngaihkhiat konpan a, Don Williams, Dan Seals, Dolly Parton, Carpenters chihte a ka ngai hi. Et na lamlam tuh mualngen muh ahi mai. Tongchiin kawl thupi takmai chiang huntawk in a ki galmuhthei a, a pamlam ah khua kisatthak khat ki galmuh chiichiai lel hi. Mei/Electric apai hoih mahmah a dakkal 24 paisuak charchar mai hi. A fee leng Lamka a toh teh in gentham ahi kei phial hi. Zaakhat bang a phakleh chu tam sak a sa maidan uh ahi. Ki khaih deuh in om chi aw!!!

A kimkhat bek Lamka zaang a din deihhuai mahmah hi. Duhthusam takngial inchu innveng mehkholh a kikholh theih hileh chihhuai tuntun maidan ahi. Manipur a khopi nihna in Mizoram singtangdawn a khua

khat phalou chihtel lawmlawm khong chu mak himai!! Pu Khamkhokam Guite laibu: “HINKHUA DAKMUAL” a ‘meivak vialpuak ukpipa’ chih thupi zanga a thugelhte kaphawksuah zungzung mai hi. Manipur electric in mipite deihsak zoulou bang kasa hi.

A khosakna uh changkang mahmah mai kasa a, lamdang bang kasa sim maimah hi. Lamka zaang a te neih bangbang; Fridge, puansawpna khawl, melmuh tongsaan te tanpha tung biubiau uhi. Fone chu ahisa in

koihleng. A neihlouh uh khat hi a katheih bel inverter ahi. Amau a din a vanneihte uh neihman omdiak din kagingta ahi. Ei a din bel asiangsiangin inn dimsak, inn cheina lel a batna chiang om hi. A minthang Job Card

bangleng a didan tak mah in loh kipia uhi. Semlouhman dingin sum nathoh uh hia kachihleh hai honsak chisim uh a bang hi. Khualzin khe ngeilou chih mahtak(kei kia banga zin hizomah), ka Nu hon gendan tak in chim

in kava chim maimah hi. Innlam bang ka ngai mahmah a, paipah bang ka-ut hi. Ka Nu toh kaki houkhak chiang un bel chim chih kammal kagenkha kei himhim hi. Innlam ka ngaihtuah sek a, ahihziak in lampi

paidan tuh katheisiam zoukei a, ka ngaihtuah khezou kei hi. Inn nopdan kava theihkhiat loh a, hampha ka himai. Zin keileng inn nopdan thei nailou lai ding kahih man in. Kava omsungin Sialkal taang a

khua khenkhat, Teikhang, Hiangmun, Mimbung, kava pha hi. Mimbung a ka tanaute uh innte kava sik hi. Teikhangte thangkhuai kava ne kha a akhum chiik mahmah. Sialkal taang a a khuate ua Biakinn te uh a hoihin a kilawm mahmah ua, mimalte inn sangin a hoihthei zaw uh. Huchi didan mah ahi de aw chihhon ngaihtuah sak hi. Pucca building ngen a bawl ahi uhi. ka Paneute kiang a Khrismas zat ding chi himahleng gari a mumal khollouh toh banah denchiah skul kai lapkei khaleng chih kalau gu sim a, huaichiah Mimbung kava phak in kavengte uh moukha a om uh chih kava thei a, huchiin a gari ua kihen theih di hia chihtoh a paini di uh chiantak kadongtel a, aw, hong kihenve, paina di kibang hiven hon chihtakun, kenle; nongpai ni chiangua Kawlbemte khomual a honna ngak di kahi kachi hi. Vangnei bang kaki sa a, ka om bang a nuamtuam hi.

Huchiin hongpai di ni un ka Paneu in a khomual tan uh hongkhak banah gari hon ngakpih a, sawt simtak ka ngak nungun gari hongtai khongkhong a, mangpha kikhak in gari ah kalut hi. Innlam zuan a paituh nuam in anuam maimah hi. Nuam chihlouh a gen didan dangtuan kathei kei hi. Ka guk nuihnuih mai hi. Sau khoptak kon tai nungun Mizoram kon kheng ua, Tuivai lui ah ka khawlzek uhi. Limlakna bangtan hiam kaneih nungun ma konpan nawn uhi. Guite Road tawn a innlam zuan di kahong hi nawnta hi. Leivui hong khu pah lunglung a, gen uangdeuhle tai na nung bang meipi zaam a zaam maidan ahi. Tut dide chihte a omthei nawnta kei a, samsau deuhbang hileng zaw guitaristte mah bang din kaki um hi. I zoudawn khua te uah inn a tamkei hial hi. Nidanglai a laibu kasim khakna te a zaw inn tamkhop omdan a simkha a kithei hi ing a, ka laibu sim te zuau amawleh, zuau hingal keileh kilawm, kalung a buailoh hi. Singtang khua ah nopni-dahni a ki-uap dante, luinak phaging sialsialte,vasa hamging tuamtuam kilawm-takte, mual-leh-guam hing dipdepte ahah gen mahmah ua, ka simkhak munpente le ahi hi. Himahleh ka mit mahmah a konmuh chiangin ki-kelki mahmah hi’n kathei. A keu a keu mai, zouhuihkhi siang bangle siangzou nawnkei phialleh kilawm, huaichiah zousiiktui bangle luangzou nawnkeileh kilawm khop a keu a keu maimah dan ahi. Lamdang kasak nawn khat ahihleh nam leh gam it, nam leh gam zuun ut chi a mipi palai di teelhun chiang a guhdawk zenzen a i genkhiat phungphungte uh koilak a om ahia??? I guh kawm a tum mang maimah hiale???. . . .chih hon ngaihtuahsak hi. Ki khemkhem khathouh i hi uh hialeh ??? Ki phatphat laizomah hang! I nam leh gam itna leh i mengmuhna (vision) un i saangkil uh kanlou khawng ana hi maimah di eee!!! Denchianga thuneihna (power) i tawi in namdangte mai a hon zahlak sak a, a nuih zabuuk lel dinguh honsuahsak khak di bang

kalau gu mahmah hi.

Ka khualzinma a i Zoudawn kangaihtuah khakchiang in , ka ngaihtuahna bang hing in a hing dipdep mai a, kalungsung ah zouhuihkhi siangte bang hong nung hiauhiau a, tuiluang gingte bang kaza hi’n kaki thei a, vasa hamging bil tai huaitakte’n ka khozaktheihna a luahdim a, huaichiangin singtang louhneih dan bangle ana kikhek mahmah di’n kakoih a, gammang thupi taktak kisaktheih pih tham di muh kaki lamen hi. A tomlam a gen in i zoudawn etlawm mahmah ding a, khantouhna bangtan hiam bek ana tungngal di’n kangaihtuah hi. Himahleh amun a ka mit mahmah a konmuh chiangin ka ngaihtuahna hing takmai a suse dimdem hi. Hichibang lawm lawm tel a zuun louh a om di’n kakoih theikei a, ka manglam kasa maimah hi. Hun tampi seng a i zoudawn etlawm dingdan kana ngaihtuahtuah pen suse maimai dia bang a chia Guite Road tawn a vazinkha kahi de aw kachi a, kaki mohsa a, kaki siik sim maimah hi. Ka ngaihtuahna hingtak mai pammaih sakna in kadim a, lakkik theih hileh kachi mahmah hi.

Nitak dak 6 vel in Songtal ka tungua, huai ah kakum a, ka Nii te innlam kazuan a, zaan kagiak hi. Ka tuanpihte bel Tuima a giak din a taisuak uhi. A zingkal dak 8 velin Sinzawl bus ‘WONDERLAND’ ah

kong tuang hi. A sung a dim mahmah ziakin a tung ah meihol bag tamsimtak toh katuang khawm ua, leivui khuut toh a meihol khuut toh ka zeempha mahmah hi. Innlam zuan a pai kihi ahihchiang in poisak

bangmah kanei nawn mang kei a, lungsim ah ‘INN’ chouhchouh om a, tun kalbang kangaklah mahmah hi. Sapte’n “THE JOY OF GOING HOME” a chihte uh himailou di hia???