Mizoramah Zomi (Eimi or G group or Tedim mi or Ciimnuai mi or Paite mi) kici khempeuh pen PAITE hong kicih banah India kumpi in zong tua mah tawhhong ciamteh sawnsawn lai ahih manin ei pen Paite i kicih tadih phot mah kul hong suak hi. Mizoramah India kumpi in a theihpihminam (recognized tribe) 15 om a, tua lakah Lusei, Paite, Mara (Lakher), Lai (Pawi), Hmar leh Ralte (Galte) pen major (prominent) tribe-in kikoih in, tua teng khilkhawmna in MIZO kizang hi.
Lusei pau zang a tam pen mana British kumpi in gam min masa pen dinga a vawh Lushai hills cih bang tan hiam a kizat touh hang, Mizoram penLuseite bek gam hi loin Lai, Mara, Paite, Hmar leh Ralte mite gam zong ahih manin phung bil khat’ min puak pen dik kisa ngei lo hi. Tua ahihmanin 1947, April 22 niin Aizawl kianga Muallungthu khua-ah Paite simin Mizoram sung leh pua pan phung 46 taangmi kikaikhawm ten minam min dingin MIZO hisak uh a, tua pen India kumpi in 1954, April 29 niin theihpihna pia hi. 1972, April 29 niin Union Territory ngaha Assam nuai pan a kilakhiat ciangin a gam min zong MIZORAM ciin zat hong kipan hi.
A tunga i gente tawh kizuiin Mizoram pen Luseite gam bek hi lo a, eimau gam zong a hihlam i tel a kul hi. A taktakin Lusei i cih kua, Mizo i cih kua, Mizo pau i cih bang? cih kician taka gen theih haksa hi. Pawlkhat in Mizo pau i cih pen Lusei pau a paisuak hi a cih lai tak un, pawlkhat inLusei pau a paisuak hi kei, Duhlian pau hi ci uh hi. Ahi zongin Duhlian mi leh a pau pen bang cih a hilhcian taktak thei kuamah om lo kik zel hi. Lusei bulpi pen tulai taka Mizorama ‘Chhakchhuak’ kici Hualngo innkuan teng baan a dang kua teng cih zong theih haksa mahmah hi. AHualngote lah tulai taka Mizo kici ten puaseh nuam dekdek zawlai! Lusei milip tam pen banga a langsak Lusei sunga lut Sailo leh Ralte (Galte) lahZomi innkuan sunga mite ngiat hi zel a, tua danin sisan zuiin khen leng Mizoramah Zomite kitam pen zel hi.
Mizoramah eimite tam pen ding himah leng, hausate hun laia hong ukcipna, Lusei pau a laanna, 1947 kuma Mizo kicih ding thukimna leh politicssai i siamnop lohnate hangin Peemta Tualteng tan i tang kha hi. Tua bang hinapi mahin phung danga lut Sailo leh Ralte mite sim lohin zong Mizoram milip vekpi pan eimi pen tu tanin 10% kipha gige dingin eilam in kiseh hi. 1921 kum census-in Lushai hills-a milip om 98,406 lakah 10,460 pen Paite mite hi a, tua lakah mi 3,598 ten innkuan sungah Paite pau zang (mother tongue) uh hi. Kum 2001 census in Mizoram milip 8,91,058 phaci leng, tun (2007 kumin) Mizoramah Paite mi 1,00,000 kiim peuhmah om ding cihna hi. A cil pek pana phung dang lakah a mangthang suak tampiom hi kei lai leng tua sang kitamzaw tham lai ding hi.
Tua hi a, Mizoramah ei cihdan leh Lusei pau kizang pen ahih mana mi gam i sa kha a, khawlaka i mi muh teng naleng Lusei vive i sa khin kha thei hi. Ahi zongin i tuah peuh kiangah “Nang Mizo-ah bang nam na hiam?” ciin dong hi leng “Kei maw, Paite hi ing, Hmar hi ing…” ciin gen ding nei tuam ciat ding uh hi. Ei zong Zomi i hihlam hong kithei tuam tuanlo hi. Hih hi Mizo a kipimuhna leh tua pen Lusei ten a meetpih bel uh! Mizoram pen a nei tuam diak om loin a ki-innteeksak siam peuh a nei hi mai hi, cih i gennop bulpi khat leh i theih ding pelmawh khat hi hen.
Tua ahih manin mailamah minam vai sai i siamnopna dingin hun beisa thute i theih masak kul a hihna tawh Sailo mite thu i gen tou ding hi. EnSailo mite leh Mizorama milip tam pen pawl Ralte mite pen Paite suan hi uh teh, i cih mah bangin, amau-in zong nial lo uh hi. Sailo mite leh Raltemite pen ei suan a hihzia Hauzel Genealogy laibu gelhpa leh Zo tate khangthu a thei mahmah Pu H.Lianzamang Guite, Lamka in a laibu-ah Sailotekhanggui hih bangin gen hi:
DUHLIAN (SAILO)
1. Guite
2. Tuahchiang
3. Lamlei
4. Leimang
5. Mangvum
6. Ngeknguk
7. Bawklu
8. Duhlian
9. Seza
10. Sehlah
11. Sihchang
12. Sihsing
Khiangte
Thaute
13. Galna
14. Suahlawm
15. Zahmuak
16. Zadeng
Palian
Thangluah
Thangur
Rivung
Rokhum
Thangur Suan
16. Thangur
17. Thangmang
Chawnglul
18. Sailo
Sailo Suan
18. Sailo
19. Chungnung
Lianlul
Chenkual
Suahlawm pen Seipui khua-a Hualngo ten a sanggamte tawh Geltui khua a simna uh pan a mat uh hi a, kileh kik nawn lo hi. A tapa Zahmuak intapa ngen guk nei a, pasal gual omna innkuan in gal leh sa-ah hong hu zo un teh ciin Tlang khua leh Khawrua khua mi ten hausa dingin pi uh hi. Alamet mah bang un Zahmuak in vaihawm siam in, a tapate a picing masa peuh hausa suaksak a, a sawt loin Lentang leh Ciau lui kikal gam tengahthunei pen tou pah uh hi.
Zahmuaka suante Lusei lah hi lo ahih manin nam min nei lo banga hun bangtan hiam a om nung un, Zahmuak tate min ciat nam (beh) minsuaksakin Zadeng nam, Palian nam, Thangur nam, Thangluah nam, Rivung nam, Rokhum nam kici uh hi. Tua banah Thangura tupa Sailo suanteng in Thangura min zang loin Sailo nam kichi tuam kik in, Sailo tapa tum pen Chenkual minin Chenkual nam piang lai hi. Tua hangin Sailogamah Chenkualte kidawk lo pah uh hi. Hih nam giat lakah Sailote a thupi pen uh hi.
Kum 1700 pawl panin Mizoram lut kipan uh a, Palian ten Ciau kan masa penin Chenkual ten zui uh a, a lom nihna Zadengte leh Rokhumte hiin,Ralte mite khenkhat in zui uh hi. A thumna Thangluahte leh a lina Rivungte hi uh a, a nunung pen Thangur nam ten Sailo sih khitin kanin Khiangtemi ten zui uh hi.
Tua laiin Mizoram a awng hi loin, Champhai kimah Ralte leh Hmarte a deuhin Fenngo; simlam Lunglei kuamah Pang, Dawn, Tlanglau, Mualthuamleh Bawng mite; a gam laizang teng Darlawng (Hmar) leh a peng dang ten luah uh hi. Zote mite Zote khuaah, Biate mite Biate khuaah, Lawitlangmite Tonsim (Chawnchhim) khuaah, Khawbung mite Khawbung khuaah, Tualte (Thiak) mite Tualte khuaah, Vankal (Thiak) mite Vankal khuaah,tulaia Paite kichi mite Sialhau, Sialsuk leh Samlukhai khua leh a kimah om uh, kichi hi.
Tua bangin a om masate heemin gam tuh suk mah uh leh, amau zong Pawi gal kihta-in Mizoram tumlamah kibu suk khin uh ahih manin Tlawnglui leh Chiau lui kikal teng 1770-1840 kikal sung awng hilhial man liang hi. Pawi gal a daih ciangin gam leh thuneihna kituhin amau leh amau kidongitnget zel uh a, a tawpah Sailo ten midang teng zo khinin gualzawhna tang uh hi. Tua zawh ciangin Vanhnuailiana in suahlam nawkinChamphai a tun ciang Sukte gal tawh kisi leuleu pah hi. 1870 kum khawng pan Sukte tawh kido nasia tou ahih manin suahlama Sailo hausa tengTuirial lui khangah kiheem suk kik liang uh a, ‘Champhai hausa Vanhnuailiana pen Sailo lalte lakah galdo hau pen leh hat pen ahi a, Sukte cih lohzawh loh a nei kei hi’ cih zah dongin Sukte gal na nanglah uh hi.
Tua banga galdo-a buai niloh den pen 1890 kuma British in Lushai hills a uk panin kumpi in hausate gam leh thuneihna ding ciangtan lim takinbawl ahih manin 1954 kum dong kuamah kinawngkaisak thei nawn lo uh hi. India in 1947 kuma suahtaakna a ngah ciangin Democracy dan tawh gam ki-uk tou pah ahih tawh kizuiin tua laia Assam nuaia om Lushai Hills District kici sunga Hausa (Lal) ten thu a neih lai ding lem nawn loin 1954, August 16 in Village Council tawh kilaih hi. Tua in compensation la hausa 309 lakah 169 pen Sailo, 50 pen Lai leh Mara hi uh a, tua lo Paite, Hmarleh Ralte hausate hi deuh pen hi. Mizoram in 1987 kumin State ngah in, tu-in India State lakah a galmuang pen leh a khangto mahmah gam hi tahi.
(Zomi Siamsin Magazine 2008, Kalay University- suah)
0 comments:
Post a Comment