A OMLOU MUN KITUH A KINA (Fighting for space that does not exist) ~ H Chin Khenthang

Tulai a ei maal-suah a, abiik a Manipur a om singtangmite’n, “Ka gam ka nam ka it,” i chi ua, “Nam min kichiantak leng nei lou, mite’ theihphaklouh nam tuantual i hi ua, khantouhna ding leh mite’ theihphak i hihna ding in state (homeland) ahihke’h Sixth Schedule beek i neih a, mahni a i kivaihawun uh ngai ahi,” i chi uh. Ataangpi in lametna neitawm mi (pessimist) ka hi kei. Hileleng hiai thu toh kisai ah bel lametna tasam (pessimist) ka hi. Ajiak tamlou i gen ding: 

(i) Nam makai i chihte’ nam leh gam itna in sawt adaih kei. Election thawm ahong gin chiang in a nam leh gam, a mi-le-sate uh a itna uh ahong puang guih a, election abei toh ton in abei a, amau leh amau a kiitna (self-love) uleh mahni’ masialna ahong kipan. Huchi in a mi-le-sate uh ahon lok pan ua, tasam leh gentheite a’ di’n haksatna ahong kipan.

(ii) Solkal nasem, “Public Servant” i chihte, mipite a’ dia phattuam ding leh khantouhnaa’ sem ding a mohpuakna leh thuneihna piak a om, huai ding a loh tampipi piak a om atamzawte’n lah tuabang a mohpuakna uh sem lou in, mahni’ phattuamna ding leh punna lel mah zong buaipih zaw ua, mipite a’ dia thil hoihlou (disservice) semtute suak zaw jel uhi. Ettehna di’n, naupangte lai hilh ding a mohpuakna nei a loh tampipi mu skulpute’n a mohpuakna uh asep louh man un i mite’n siamsinna lam ah haksatna leh niamkiakna lianpi tuak ua, doctorte’n amohpuakna uh angaihsak louh man ua damloute’n haksatna leh beidotna tampi atuak ua, khantouhna (development) nna sem ding a mohpuakna neite’n a mohpuakna uh sem lou a, amau’ phattuamna ding kia abuaipih man un i gam uah khantouhna a-om thei lou hi.

(iii) Gam leh nam’ khantouhna ding in politics leh vaihawmna lam a thuneihna sangzaw i neih uh poimoh ahi, i chi uh. Hileleng, “Thuneihna in (mi) ahihsia a, thuneihna lian in (mi) nakpi in ahihsia” (Power corrupts, and absolute power corrupts absolutely”), chih thupil a-om. Jesu’n, “Tawmchik tung a ginom mi tuh tampi tung ah leng a ginmom a, tawmchik tung a diktatlou mi tuh tampi tung ah leng adiktat kei,” achi hi (Luke 16:10). 

Autonomous District, Village Council leh thil tuamtuam ah thuneihna lian loulou i nei uh. Hileleng huaite i gam i mite’ khantouhna ding leh phattuamna ding a ginomtak a zang lou in, mahni’ phattuamna ding leh punna ding in i zang ua, ajawng leh tasamte a dia thuakhakpipi i suak uh, chih kuapeuh in i thei chiat uh.

Hichibang thuneihna lianlouloute a bawn ginom lou i hihman un, Sixth Schedule hiam, state hiam mu in thuneihna sangzaw tawi le-hang leng ei leh ei kinek gawp-gawpna a zang kha ding hang a, mipite a’ ding a thuaklahhuai leh haksatna tuntu suak kha ding hang a, i phattuampih naksang a siatloh zaw kha lou ding i hi uhia, chih ka lau lah kei hi. Tua ahihman in, “Homeland” (state) i chih solkal in kuang a lui in (on a platter) hon pe le-leng thil hoih leh lak tuak hi ding hia, chih ngaihtuah tham ching ka sa hi. Hinapi in, i gensa bang in, akua’ nam akua’ nam hileh, nam leh gam it i kichi ua, nam leh gam masawnna ding leh mite’ theihphak i hihna ding in state i neih poimoh ahi, i chi ua, a gam a lei omloupi in state tuam chiat neih sawm in i kina-na ua, nam leh nam kikal a kihou-theihlouhna leh kimelmakna’ chii (seed) i tuh-tuh uh.

Tua ahihman in, i theih ding ua ka deih, gen ka tup pen ahihleh, state (homeland) neih se louh a leng masawnna leh khantouhna om thei, mite’ theihphak a om theih luat ahi, chih ahi. Ettehna khat leh nih i gen ding:

(i) India pumpi ah Parsi mi (i theihpen Tatate) 1,00,000 val a-om ngeikei ua, tu’n 70,000 khawng lel a-om uh. State gen louh in, district khat leng anei kei uh. Hileleng siamna-pilna, sumdawnna leh hauhsakna ah asang

mahmah ua, industry (thilbawlna) lam ah India a’ di’n lamkawkmuhtu (pioneer) ahi ua, thilbawlna thupitaktak tampi anei uh. Tuabang ahihman un, Indian politics leh kivaipuakna ah kuamah in anelhsiah (ignore) theih vual hilou uhi.

(ii) Indian Civil Services Examination a telte leh a result en khate’n Rajasthan a Meena kichite i thei ding uh. Meena state anei kei ua, district leng anei kei uh. Hileleng kum teng in a-dorzon a sim theih civil services leh

adangdang ah alut ua, huchi in central government leh state government ah vaihawmna leh thuneihna tampi atawi ua, mite’ theihphak ahi uh. Parsite, Marwarite khawng bang in sumdawnna leh thilbawlna lam ah i lohching kholkei maithei. Hileleng thil dang hihtheih neilou i hi sam kei uh. Central Services leh State Services khawng a i lut theihna ding in theihtawp suah in i pang thei. Delhi leh state government tuamtuam khawng ah dinmun sangpente len thei (top level officers) bangzah hiam om le-hang kua’n hon theilou ding ua?

Mihing in ahih theih tampi a-om. Lunglutna leh tempaina leng anei chiat ua, huaite ahoihzaw, ahoihlouzaw, asangzaw, aniamzaw chih leng aom lawmlawm kei a, asemtu in hoihtak a ahih leh ahoih vek. I hih theih lamlam ginomtak leh kuhkaltak in hih chiat le-hang lohchinna om ding, mi 100 lak a 20-30 hiam lel in leng lohchinna ngah le-hang, mimal’ lohchinna midangte’n hamphatpih ding ua, i chi-le-nam’ lohchinna leh khantouhnasuak ding a, mite’ theihphak hi ding hi hang.

Tuaban ah, thil khat peuhpeuh, i hih theih lamlam lunglutna leh chihtakna toh kisin in, siamna, theihna, chinna leh kivakhna (kizenna) nei in, bang lam peuh hitaleh septheihna leh kizenna nei tam peuh le-hang, ei’ state sung kia hilou, India sung kia leng hilou, khovel pumpi ei a’ dia kihong ding a, i gam suak ding hi. Tua ahihman in, tuailaite thou ni in, agam-alei omloupi a state muh sawm a i hun, i tha-i zung leh neih-le-lam zang lou in eimah’ nna chiat awlmoh ni in (minding our own business), ginom, thanuam leh kuhkaltak a pang in, eimah’ mimal’ khantouhna ding leh masawnna ding in panla chiat ni, Homeland vai pen hih ding dang nei lou, lamet ding dang neiloute’ buaipih ding in koih ni.