Mi kuapeuh in polam apat hong kipante thilte a ki control zoukei hi. Na control zoh ahihleh nang na dawnna ahi mai hi.
Tehkhitna in nang competitive exam ding in kikoihta le chin, nang kha na lungsim a huai examna a bang pass le chin college hoih mu di, huai college hoih mu ki chi nang a dia a ahoih a hi chih thei di hi ve chin. Na nuleh pate’n huai mah nang a pat hon lamet ahi chih nang leng na thei hi, huai admission mu din hon na lamen uh hi. Huchi in hun hong pai zel a exam result bang a hong suak ngei a nang lah na pass ta kei hi. Huai hun chia bang na hih a leh ahih kei leh bang na chi om a leh?
Huai hun chia na lung a kia mahmah mai thei ding a, nang leh nang bang na kimohsa kha mai thei ding hi. “Mihai, mile pha zoulou ka hi” na kichi kha maithei hi. Hiai ngaih tuah na in na hunteng na zang bei ngei hia, ahih kei leh na vaang (luck) khong na ngoh mawk hia leh? A hih kei leh “Wow, hiai ahoih hi!” chi in na maban na sontou hia ?
Thu malkhat na kam a na loh khiat in na hinkhua ah kikek na lamdang hon tunthei hi. Na tung a thil hong tung bangbang ahoih ahi chih na pomtheih a poimoh mahmah hi. Hiai in na hinkhua paisate a hong khek thei kei, himaleh na mailam hun a din kikek na hon tunthei hi. Thil na khek theih lou di khong buai pih ngai kei! huaisang in thil na khek theih dingte a na lungsim koih zo in, huai ding mah in kisakhol gige in.
Thil khat ahih kei leh bang hiam hihkhelh kong na neih chiang in, na thil hih pen na ngahtuah a, mi ngoh ding khong na zong zo kha maithei hi. Thil tuam ngaih tuah in na maban ding ngaihtuah lou in mi dang ngoh ding khong na zong zaw mok hi. Tehkhitna in Kong khak (door) khat lam a kikalh leh huai kong khak aki kalhsa kiukiu sang in, kongkhak dang a ki hong om hiam, chih zong zo le chin nang a dia phatuam zo ding hi.A nawn chiang in lungkham, ahi kei leh buaina na tuah nawn chiang in, khol zual in, hu lasuk in laa (take a deep breath) huia zoh chia nui in. Huai khit chia hiai African Lengpa (King) leh a lawmte tangthu ngaihtuah in.
Lengpa (King) leh a lawmte ahih leh minuam leh nunnemte ahih uh hi, thil himhim a hoih lam kia ngaihtuahte ahi uhi. Thil bang hiam a sia apha bang hiam omta lehleng alawmten “A hoih himhim hi” a chi zel uhi. Amaute Lengpa toh gamlak khong a sa beng khong in a kuanzel ahih keh galdou in a kuan khia zel uhi. Huai hun chiang in alawmten Lengpa thau tang ding thunsak leh kamsa in pia a akap ding in a pia zel hi. Nikhat ni in, alawmpa khat in huai thau kamkhial kha hi, Lengpan huaithau akikam sa a lak leh, akhutpi a kaptan kha hi. Hiai hong tuahtak in a lawmten “A hoih himhim hi’ a chihsan zel nawn uh hi. Hiai thu Lengpan ahon zak tak in, lengpa a hehlua a, a lawmte suangkulh a khum hi.
Kum bang zah hiam a hong pai khit nung in, gammang lak a vak in Lengpan sabet a hon pan nawn hi. Huai mun ahihleh misasialnete (Cannibals) omnamun a sabeng in a va kuan kha laizang uhi. Huai zoh in hiai Misasialneten a Lengpa man in,nopbawlna a nek ding in a hon koihta hi. Lengpa khutte a hensak ua, a pumpite a silsak ua, belpi liantak sung a koih in a hon huan sawm uh hi. Huai laitak in mikhat in lengpa khupi a omlouh lam a hong mu kha zenzen hi. Hiai misasialnete superstitious (dawi leh kau biak na gigtate ahi uhi) ahi uhi. Amauten mitaksa bukimloute a ne kei himhim uhi. Huaitak in a Lengpa a kha khia uhi.
Huchihtak in Lengpa in a hongtung hi, nidang a a khupi a kap khiat khak lai hun a hon ngaituah khia kha hi. Huchi in a man a lawmte thugen pen a dik ahi chih a hon phawk khia thak nawn hi, “A hoih himhim hi”. A khutpi a neihlouh ziak in a sina ding lampi zuan lai a hinna humbit zo mawk hi. Huaitak in a lawmte kiang ah kintak in a vo pai a ngaihdam a vo ngen hi. “Ken noute suangkul a kon koih ding ahi kei” a chi hi. “Ka thilhih a dikkei” a chi hi.
“Hilou hilou ahi. A hoih himhim hi!” chin a lawmte khat in a gen hi.
“Bang na chihna ahia” chin a Lengpan a dong hi . “Bang ziak a noute
suangkulh a kon khum hoih ahi thei dia hia”
“Na mukei a hia?” alawmte khat in a chi hi. “Tun kou suangkulh a om lou bang hita leng, nang toh gamlak a sabeng a kuan ding in a, Misasialneten hon that a hon neding uh ahi achi hi.
Huai mah bang in, anawn chiang in na ngaihtuah louh bang a thil a hong pai khak chiang in, hiai Lengpa khutpi ngaihtuah zel in. Huai chiang a na tung a thil a hong tung chiang in, “A hoih himhim hi” chi zel in. Na omna mun hoih a hong suak ding hi. Mikuapeuh in polam a thil hong kipante ki control theilou hi. Na control theih omsun tuh nang na dawnna, nang zatdan ahi mai hi. Nang mah in a thilhoih natel thei dia, nang mah in thilhoihlou lamle natel thei hi. Nang deih telna ahi mai hi.
Lungkham a mau vungvung a na om a hiai a hoih kei na chih leh, na lungsim in haksatna lam kia ngaihtuah ding hi. Huchi mah bang in, hiai “A hoih himhim hi” na chih leh na lungsim in haksatna lam a ngaihtuah kei dia, nulung a nuam dia na tup na mualsuah zou ding hi. Hiai ahi zou (winner) leh lohsiam (losers) a ki bat louh na.
Huai ziak in “A hoih himhim hi” chi suk in. Hinkhua a dia poi moh mahmah khat ahi hi.
(Hiai ka thugelh ngaihtuahna hoih (positive mind) lam a lakna dia ka gelh ahi, “a hoih himhim hi” chi a en pan I lak tuan kei leh a phatuam omkei ding hi.)
0 comments:
Post a Comment