"Saichim mawng khuang singsi khauhsai" hiai Paunou la thu nalh ka sa mahmah a, bang genna ahi di aw chia ka ngaihtuah tuah leh Guiter a genna hi di`n ka ging.Hichibang la pau phuahtawm theite hi kei mahle i zat sekte bangchi dana hong piang ahi di chih genkhawm in suikhawmle a chìì viau di`n ka ging. Kenle theihchiang ka nei chuang keia, ka gindan on gen mai di ka hi. Adik zaw theite`n non hilh theih ualeh kipahhuai mahmah di.
Amasa in La thu, La pau kichi kuamah a tuam ahi keia, Dapzar/l te`n La thu, La pau neilou chih bang diklou ahi. La thu ichih om tuam, kuamah pau bik hilou, zatpil theih omsun ahi chile i khialtam kei di. Paite pau chi tuamtuam atam a. La thu chauh ahi izat piil theih, i kikop theih leh mun tuam gam tuam a omte on ki unau saktu.
1. Mu bang ngai- Mu nupa khawng vanlaizawl ah ki ngaih mel tak in a lèng delhdelh sek ua, huai apat Mu bang ngai chih hong piang ahih mel.
2. Khuam bang kip/khauh- Inn hiam aw, Buk hiam i bawl chia a poimoh pen chu kiptaka a khuam phuh ahi. Kiptaka a khuam i phuh leh huihpi vuahpi laka bit deuh dia ngaih ahi a, huaiziaka khuam bang kip chih hong piang ahi di.
3. Tui bang gawm- Mual leh tlang/Taang apat guamta/luita ah tui tamlou in a luang a, mun niam leh zaanga luangkhawm a ki gawm zel ahi ua, huai genna a Tui bang gawm ki chi zel ahi.
4. Sawl bang hei- Huih a nun chiang a Sawl/Sawlpa, Nahpa taang a kihei zel hiven, huai apat Sawl bang hei kichi ahi di.
5. Khau bang sut- Khau kichi thil hen na di, khih na di a kizang ahia, huai aki khihte ki phelh sek hiven huai apat lak ahi di.
6. Khau bang chiah- Gin dan mailou inchu ka chiang kei. Khau a pai theihlam ki thei bok silou. Lele Nupi te`n Mui a patlawm khek sek uh hiven. Amui veilam tuul/sik zum cheuchau a pattawn man bet un, huai khau hong suak. A pei chiang ua hong pai zatzat hiven huai apat khawng a hong piang ahi di`n ka ging. Sutlaam khawng le hi thei thou.
7. Li bang ching- Tui luang him him ah mun niam, tuiching tamna bik a om sek a, huaite Tuili. A Li ki chi zel ahi. Huai apat hong piang a Li bang ching chi zel uh ahi di.
8. Sam gi bang khen- Lu zaanga Sam ki khen sek hi ven huai apat ahih mel.
9. Gi bang khen- Lou, gam leh huang ah veng leh pam te toh gi i kham sek ua, huai apat ahi di.
10. Lou bang tul- Singtlang lou kha kumkhat bak ki nei ngeilou a, puahnawn lou in hong tul zel hi.
11. Tem bang deih- Nidanglaia sììk vang a vang in, tem khawng neih haksa mahmah a, huai apat hong piang ahi di.
12. Puan bang baang- Pawtsuah, Kuan khia te`n Pai chia dong aak ki heng zel a, chíngzan leh tangban khawnga ki baang zel hiven. Huai genna ahi di.
13. Va bang pil- Sava veh khawnga ikuan chiah gamsa dang bang lou tak in Sava te`n a lu uh a hei lelep ua, a fimkhur ziak uh ahi. Gamsa dang teng sanga pilzaw a bat ziak in Va bang pil a kichi sek hi di`n ka ging.
14. Tuang hong tung - Zin leh vaak damtak, tluang tak a tung genna ahi di.
15.Hai bang ngak- Nidang a zu dawn khawm a la sa khawm sek leh pu zu khawng a ki kholh chiang ua zu taktak dawn hi awmtak ahi ua. Tulai banga Nou/Hai tamlou in,a dawn zoh uh ngaklah tak a ana ngak zel uh hi ngei di in, huai apat Hai bang ngak chi zel uh ahihmel.
16. Mawng bang kawi- Mawng gah kha sava leh gamsa dang in ne uh a, singkung dang khawng a ek tha un, huai hong pou/hing inkha a pouna sing vet, zam in pou tou, huai apat ahi di`n ka ginga. Mawng bang pem chihle Sava leh gamsa dang ek thak, mun danga a pou zel ziak ahi di.
17. Taang bang dam- Gin dan 2 ka nei. Khatna ah, Taang kichi Zomi te lou a i chiin poimoh mahmah ahi a. Tang` tawmchik chik a ki tuh hong pou suah a hong dam suah gen na. Nihna ah Nidanga Zogam kha gam hoih, Taang/tlang a sing pou hing dipdep zel ahi a. Dam diidiai zel hi ven, huai apat le hi mai thei.
18. Lim bang bel/belh- Nisa volvol thuak haksatna mun ah singlìm khawng, mun dai khawng a ki bel a huai apat ahi di.
19. Sial bang lian - Sial hi Nidang a gou manpha leh man tou mahmah ahi a, huaiziak ahi di.
20. Lawi bang thang- Lawi ichih gamsa lian leh manpha, nidanga i gama tamlou, min thang tak ahihziaka Lawi bang thang chih hong piang ahi di.
Al bang dah, Al bang mang, ham bang vai. Hiai teng bangchi dana hong piang hi di`n na ging a? - See more at: http://mzrpaitelink.weebly.com/la-thu-zir-khawm-ni-gl-samte.html#sthash.dUjP3B15.dpuf
0 comments:
Post a Comment