Birthday -Jimmy KaikhanmangGuite

Happy Birthday: Zomite’n ‘pianni’ i chih pen namdang paua ‘birthday’ hong kichih chiangin ei tuailaite hon den gikdeuha a puak leng zangdeuh hiv’aw na chi tei uam ? Khotheih deuh nunga mi’n ‘na pianni

lungdamhuai’ hiam ‘na pianni hon kipahpih ing ei’ hon chih duanduan sang ua ‘Happy Birthday’ ngat hon chih uleh changkan huai mai hilo, a ging mahmah leng kilawma ngaihnathuai chitchiat hi ei. Khovel in a piak theihloh, mihing pilna in a suktuah theih mok leng hilo; Pathian vualzawlna ziaka nupa kala naungek hong piang bang zaw a paitu nuleh- pa, a dawntu ding pi-leh-pu adia kipahna tungtuan diak ding mah

ahi. 

“Bawi aw hong khang mengmeng aw; pama luidawng hong bang aw, pama luidawng nong bat chia’n; Nu tha dawn aw, Pa tha khek aw, tuai aw e” 

chi a pitek-putek te’n nauawihla a sak lai un bang lungsim nei di’n na ngaihsun a le ? Kuahiam lasasiam khat in a sakdan zuia sa mai uh hiin na gingta thei hia ? Tulai khanga awlsam taka ‘Happy birthday’ chih mobile phone apan sms kithot hiam sumzong mite vanzuaknamuna chibaibukna laithem ‘greeting card’ kilawm deuh va lei zuala kipiak sang in pitek-putek, nu-leh-pa ten pianpih awsuak toh lungsim tawngdenga tate deihsakna ‘nau-awih la’ a awih uh nak vualzawlhuai na mah in chia !!! Mihing pianni sang in amah apiangtu a poimoh zaw gige hi. Kristiante Laibusiangtho ah, 

“..mihing khawlni adia bawl ahi kei a;

khawlni mihing adia bawl ahi zaw…” 

chiin na gelh hi. I pianni sang in a piangtu ei hinna ah inu-ipa, ipi-pu leh pianpih-laizawmte lam-etna

sangtak a om gige hi chih i pawmtheih ding ahia, bang dinmun ah ding ta buang le’ng zong tua lam-etna vuaksuak sak mi tuh a damsunga mi lohsam ahi chih bang mailam kalsuan na dia mangngilh loh ding kalbi

poimoh mahmah khat ahi. Bangpiin i ngaikhok ut naikei ahi maithei, tuisik-nausen apan tua lam-etna toh honna ngak tun-leh-zua, pi-leh-pute midang sanga mawl-leh-sah himah le uh a leitung nitawpni un leng tua

lam-etna mah siksana nei in hon itna uh nou ngii-ngei lenkip tinten kawm in eive hankhuk a lut ding uh. Tuahun a tun ma un, a lam-etna uh thaksak gige in i hinkhua akip-akawi lunglut, ngentel leh pilvang taka honna ching/enzui ngitnget uh ahi chih mangngilh hetloh ding ahi. Tuisik-nausen i hihlai a honna dawmkangtute khut ah Pathian in vualzawlna A sekkhawm hi chih leng i lungtang sung ah tamden hen.Tua theihna kalsuanpih tuh damsung lamzanna dia Pathian seh lampi ahi.

Naupang tualtai: Nu-leh-pa, pi-leh-pu ahihkeileh itna toh hon khawiliantute khut sung apan leikanga khovel neuchik a kizatpat kiangkiang huna muan leh belh pen, thilbangkima tungnungpen a koih mite zaw vangla singkhual mi hilo, pianna tunnu-zuapa leh theibangsena tubang hon ching pi-leh-pute mah na hi nilouh mok uh hi’vaw. Khanvual laka vuallel-tansia kisa a khasiat-muisiat huna ngaihtuahna a kilang masa pen leh lam-etna kingakna pen zong amaute mah hi zel. Lawmta-khanvual kinak-kisiat nikhua a honhum-honliah ding belhbul pen nu-leh-pa mah na hi teitei uh. Lungzin-mangbat leh kipah-lungkimna teng midang sang in nu-leh-pa khebul mah a kitun masa pen lou thei kei. Naupang melmol in khovelthak ah dotna a kihau nasa maia, chimtak hetlo a tua dotna zozaite hon na dawngkim sipsip amau mah na hi tazen uh. Pathian in tuabang hunte nung suikik thei dia pilna leh theihsiamna nei ding khop a tuailai hinkhua hon zatsak lai in hun paisate aki mangngilh thei mokmok sek hi.Naupang tualtaithei hih lai huna nu-leh-pa muanna zozai teng tua koi a ki selmang hita lawmlawm ding ahia le ? Pathian in hon siam mihing khat hisam, tuailai ki hi zawmah; neulai hun suikik vengveng dih ni e. Haksat-lungzin, lungdam-kipah ni in kua in a hon khasiat pih in kua khamuanna in hinkhua adia thathak hon guan zel hiin i ngaihsun a le ? Naupang tualtai-khetawithei i hih laia inu-ipa i muanna teng mangsaka kua kianga muanna nga ding i mah a ? Tuailai dinmun toh kituak khanvual-lawmngaihte ziaka nu-leh-pa, pileh- pu leh sungkhat-laina mangngilh khopa hinkhua zangthei dinga Inpuakonglai nopna lunggulhna in lungtang sungah munteng a luahdim thei tham ding. Himahleh maw, laphuaktu in, “Lawmvual hong kikhen dia..vangtah ka sau naubang kah na..” ana chih bang deuh in, mimal hinkhaw lampi tuamchiat zuih hun a hong tung pah dia, lawmvualngaih te’n lenmual hon khupsan ding ua; a pangkhialpa a ding ngial in zaw lu i khuat dia ‘samzang’, i dinna lah ‘leikeu’; lungzuang-khawngai in galkhua dak le’ng ‘kawlmong-muhtawp’…. tunglam ah van a sang khop ding . Tua tuh ana paimasa mi tampite hinkhua leh a bawlthak theihloh uh kisikna khukpi sulnung ahi. I zuizel ngam na diam ?

Siamna leh Theihna: Siamna a hiam(sharp) a, Theihna a tou(lasting) hi. Siamna nei mi tuh mi ngaihsan huai ahia, theihna hau mi bel mi lohching ahi nak hi. Tuailai kisinsiam a pahtakhuai a, lunggelsiam mi tuh mite zahtak aching hi. Leitung siamna in nu-leh-pa ai’hkeh vualluite theihna lam tampi ah delhpha zolo teitei hi. 

Amau sanga laisiam leh sinna sang suanlam in hon suangtu nu- leh-pa, pi-leh-pu simmoh kha kei

ni. “ .…Mimbang i pian khiatna i leitung Pasian ahi…Simlei mizalai ah tun-le-zua tampi omlo… “ laphuaktu Lengtong Paunou in na chi hithiat hi. Theihna ah amau dinmun tan tung dingin tuailaite’n kal tampi

mahmah i suan lai kul dinga, leitung hinkhua anuam-ahak, nop-leh-dah tampi thuaktouh zellai ki phamoh ding hi. Pila-siama, thatang-ngalhat toh inu-ipa paikhengta kisa in a luzang uah suk-et utsim sek mah le’ng,

ngeksen-tuisik pana hon domkanna uh khut-leh-khe a hat nawnlote ei adia thatang-lungsim lamkhetu vualzawlna ahi. Tuapen mah a muangngam, a zahtak mite mi lakah mavang-muingil tuamse uh ahi chih

chiamteh tin-ten dia hoih siamna mai hilo in theihna manpha ahi. Tua theihna a zangsiam mite khovel in mipil a chiamteh hi tazen ei !

Hankhuk leh Tangtawn: Leitung mihing, beidong-kamsia kisa mite’n tangtawn hilo khantawn nangawn sawtlua sa; leitung hinkhua chimtak in hankhuk tungbaih sek mahle uh hankhuk toh kizom geih in a chimtak

sang ua sawtzaw tangtawn om ahi chih ngaihsun phalo uh hiam, a theihsa nangawn uh mangngilh hi kha ding uhi. Mihing in a kumtam leh upat suanga mi laka a ki thupisak lai in niteng-hunteng leh dakkal sim in

hankhuk naih hiaihiai ta lawmlawm hi.Tua hankhuk a lut nini in tangtawn toh na kizom nalaidep ding hi zenhouh settawk kawithahah hi. Tangtawn gam bel mihing thuneihna om nawn kii-kei loh na, Nuai Zinmang leh Tung Pathian lalna gam liauliau hi leuleu ding hi. Apil-asiam, ahai-amawl kikhen theilo dinga; deihtelna, leitung damsunga mimal lungtang deihtelna in vaihawm khum ta ding hi. Mihausa kuahiam in leitung ah khutdawh Lazar a om lam thei a, a sanggamte pasal toupi mihing nga hilhial leitunga hing-dama om uh ahi chih tangtawn gam ah phawkkhe pan phing hih tuak hi. Theihna zekai, pilna-hai a suak hilhel tel hi. A nget ngutngut nangawn a lohsam hi. Hankhuk tawnsuaka tangtawn gam i tun chiangin tuamuna omden ta ding ‘pianni-Birthday’ thak liklek hong piang mok ding a; khenkhat adia ‘very very happy Birthday’ hinapi, kuate hiam a ding in bel ‘pianni lunngdamhuai’ hi thei ngello dinga; zong hi thei ngei nawnlo himhim ding hi. Leitunga mihing a damlai in Pathian leh Setan kituh nilouh hinapi tangtawn gam ah tuabang kituhna om vetlo dinga, mihingkha pen a leitung damsung theihna-deihtelna zuiin; a telsa kumpipa kianga tengden tading in awlsam takin pai hiau ding hi.