uh leh
niteng tanchinbu te kana simkha pan hi. Hiai laibu leh laigelhte ka na
simkhakna apan ka lungsim ngaihtuahna honla mahmah om a, huai bel
singtangkhuate a hindan, khawheidan, tawndan leh omdan awlmawhna lianpi toh
hon gelh zelte uh ahi. Himahleh vangsiat huaitak in singtaang hinkhua
omdan theihna hon petu i magazine suan mahmah bangzah hiam te’n hon
muih san maimah tak ziakun poi kasa mahmah hi.
A chang bangin i
singtangdawn lam ngaihtuahna in hun kana zangkha zel hi. Ka pianna leh
kum sawm-leh-giat(18) bang kana khankhiatna ‘LAMKA’ ngeileng
singtang khuate lak a khat himahleh singtaang khua min a paw zou kei a,
‘CHURACHANDPUR’ min a pawzaw daih a, Vaite/Meiteite hiam
khawmin a bangzaw daih maimah hi. Ka laisim
khaknate apanin mual leh taang hing dipdipte omna, huai mual leh
taangte kal a luite luang a, huai luite a a lim mahmah singtaangpa mintam a
kiphuak hi ngei di singtaang ngasate om ua, luitui luang ging biabiate
music nalh taktak hingal ua, vasa chi tuamtuam te’n zogam ngaihla
amau phuah chiat siamtak leh lungkimtak a a sak zelte uh, zoutui lim mahmah
leh siang kil-kel, Lamka a mineral water sang a limzaw siang kil
kel, huihkhii nung hiau-hiaute sianglua ua ‘zouhuihkhii siang’ chih a
minvuah in om a, zoudawn mual leh taangte pak chi tuamtuam te’n
chei/zeem gige uh chihleh mual leh taang sang deuhte meipi
etlawmtak
pak khe bii-bia zezen te’n bawm lii-liai a hihdante kathei a, dik mahmah
dingin le ka ngaihsun a, i zoudawn muhnopna leh ngaihnatna in ka room
ningkhat a tu in hun kana zangsek hi.
Laigelhtu
a tuam dungzui in a gelhdan uh leh a lunglutna uh hong kibang vek
sipsip kei hi. Khenkhatte’n lunglut huaitak a simtheih din singtang
lou neihdan, lou kuan dan, tu leh hei zat dante hon gelh uhi. Azu-aham
thuak a, vuahzu-daikai, thousi-thouvai nuai a mittang kelehle tawm
manlou hial di khop a thanuamtak a lou na sepdan leh haichite hong
pichin chiang a et a tawldam huaidan leh a kipahhuai dante hongelh uhi. Thei
chi tuamtuam dawnpawl, mazel, tangmai, adg.adg chihte a min hunchiang
ua neek senglouh a om a, muat maimah uh ahihdante bang i theihchiang
in chil(saliva) hongphuul a gil bang hong kial mawk hi. Pammaih
sak in om a, huaite ne ding mawngmawng a vazin bangle uthuai maimah hi.
Pak khenkhat iva suanle hilou, i huangsung a poule hilou i muh khak
zual in le kipahna hontunthei a, huchi ahihleh nasepsa a gah muh ding
bangzahta in kipahhuai ding a chih kei bang lel tak ngaihtuahna in ban din
kaging kei hi.
Khenkhatte
leuleu in ITNA thu lampang lunglut huaitak a hon gelh uhi.
Loukuan louh ni a a
ngaihnoute inn a valengla a,
a ngaihnouin tongdam
nem tak in ana
vaidawn a, amanle maingaltak
in a ngaihnou nasepte ahihtheih
dandan in seppih a,
a hunawl un innkatau a
a houlim kawmkawm
un dawmtak in
sam kihiatsak zel dante uh khong. Loukuan ni a loukuan dia kithaloh/
kilawm a tonkhawm zel a, sun an neekhun chiang a le a neekkhawm,
dawnkhawm leh khawlkhom a, vai paihun a paiton zel, a ngaihnou
in nitak chiang a, a inn ua lengla dingin melhcheuh, amanle theisiamtak
in alu su ngaungau hi. Kisilkhin, annekhin phetin a ngaihnoute inn a
lengla din pawtsuah nawnpah hi. A ngaihnou in siamtakin ana vaidawn a,
a neekding bangbang hiam, baalke pumhuan, kawlkai chihte a mai ah
honlui khia hi. A ngaihnou khauzial a zialpih a, ahuchihkal in zan
hongsawt in pai din hon dingkhia a a ngaihnou toh mangpha hoihtak kikhak in
lungkimtak in hunte na zang uhi.
Singtangdawn
i chih chiangin ngaineu deuh i bangsim ua, ken tuh a ‘DAWN’
chihsangin a ‘BUL’ chihlouh din pammaih kasa mawk hi. A ziaktuh
tua Lamka a omte gentaklouh mundang/ gamdang, foreign a omte
tanpha i kipatna mun uh ahihziak a a ‘BUL’ hizawlou ding hiam ka chihna
ahi. Banah i heutu masate leh i officer lian taktak a nasepna ua ginom leh
muanhuai mahmahte hong kipatna uhleh khankhiatna mun ahia,
Pathianin eite a dia hon vualzawlna mun hi dingin ka ngaihtuah hi. Pathian in
Zogam nuamtak i tenna mun dia hon sehsak a, huihsiang, tuisiang,
sing-leh-guate kiningchingtak in hon vualzawl a, gamsa leh pak kilawm
taktakte omna mun a kikhual a, lungkimtak a khosa hilehang mihamphate
mite’n hon chi mahmah ding un kagingta hi. I zodawn
siamsinna
innte puah in, a kua-kua in theihtawp in panla hile hang tu sangin
heutu muanhuai leh officer tampi kibehlap dingin ka gingta hi. Hileh, ei
kigen ngailou in namdangte’n nam enhuai, nam khangtou leh
Pathian
tel namte hon chi maimah lel ding uhi. Zoudawn i nelhsiah ua, i puah kei
ua, i taisan bawl uh kachihna bel hipah samlou hi. Ka
ngaihtuahna mawkmawk ah bel i zoudawn lam a siamsinna thupi ta mahmah
ding in ka ngaihtuah khanak hi. Siamsinna innte le a baang mauten
chihte hinawnlou dinga, huihpi a nungchiang a khawl ngai chihte hilou ding
a, teklei baang pucca building a bawl hi mahmahta din ka um hi. Skul
naupangte le uniform ginatak a kithuam a skul kai din um lai ing. Banah,
highskul chauh hilouin, secondary chauh leng hilou in, degree aktheihna
ding kolege hoih mahmah leh mundang-gamdangte ading ale naihtaak
leh kingakna taak khat-leh-nih bek om mahmah ta dingin le um ing.
Tunung hun a i makai muanhuai ding, mipite lamdik a honpi ding banah kua
namte ihi ua chih mite theisak ding a office lian mahmah a kigenteng
a tu ding i mi-leh-sa piankhiatna mun ‘ZOGAM SIAMSINNA NN’ hi
ngeingei dingin kana ngaihtuah hi.
Himahleh
tulel in i zogam dinmun genkhawm ni chile hang, temtatpu tangthu
bang di’n kagingta hi. Ken ka hih ding kana hihkha kei a eive, ka naa kazou
kei a eive, kei mawh ahi, a poilua chi ding omlou phial din ka
um hi. A
hihziakin lah gending hun a ana genkha lou, sak ding hun ana dai maimah,
sep ding hun ana khawl kha, a puah hun laitak a bulpat sawm lou,
hihkhelh hun a ana kidiksak teitei, kiphattuah hun a kigen siasia,
kei
hihkhelh, kei mawh, kei ziak ahi chingam ding mimal, mipi, heutu
kipoimawh na hi leltak hi.
Ka Pa
kiang ah singtang a a khosakdante uh khong ka kan zel a, amanle
lunglut huaitak leh ngaihnophuaitak in hon hilhzel hi. Lui dung a aisa-kua a
sawk dante uh, luipang a tu a ngakuai khai a hun a zat dante,
gamvak
dante khong uh, nga phuul omhun chiang a a mat dante uh, buhlak dan,
inntan a puaktung dante uh, thaang(trap) kam a sa a mat dante uh, lou a sun meh
huan a limdan dan, haithak latna a zatdan te uh hon hilh hi. Ken bel tua
kapa hon hilhte ka tuak kha kei hi. Himahleh ngaihnatna khat nei kahi ngei
dia, lungsim ngaihtuahna in bel kava tawn khazel hi. A changin ngaihtuahna
bangah thaang kava kam a, ngal(wild boar) tuuk nga a lian khong kava
manzel hi(ngal mukha ngei tuh kahi kei). Atak in va mu hial lengle hou
kasa phing de aw.. mulou a thupitak hi dia ka ngaihtuahna pen houh a
thupi zaw de aw ka chi nawn zel.
Ka Pu
kiang bang ah le ka dong khazel a,
Pu.. “ hatlai
bang hile chin koimun
ah na khosa nuam a chi a ka dot bawl chiangin ‘SINGTANG’ ah
chi’n
hon dawng zel hi”.
A utna ziak ka dong nawn zel a,”singtang a omhileng
tuh ‘MALTA’ lei kabawl di, malta hong gah a, a hong san phingphing
chiang mahmah in hon kipaksak ahi” chi’n hon dawngzel hi.
Tek
mahmahta hinapi bangziak a a ngaihtuahna a “SINGTANG HINKHUA”
mang theilou a de aw chih lampang in hon buaisak zaw daih hi. Amah
bang a mi upa khenkhat inle a neulai hunnuam zatna ngaihtuahna
in
lungleng tak in hun ana zangzel thou ding uhi. Tu hun in
a neulai hunnuam a zatna mun uh ngaihtuahna mai hilou in a taktak
in a mit mahmah un mu le uh bang a chi himhim di ua? Tenna taak,
khosakna taak a sa lai di uam? A mau kinepna bangun a na vaidawn na
diam? A gamvak seknate uh gammaang ana hilai diam?
Gam
ngaihlaa phuahtaak a sa lai na di uam? Zankho dai maimai bangin le a
lungleeng sak zou lai diam? Zankho dai nuai ah a lungleengtak in zaila a
awi nuamlai na di uam? Amaute i pu-leh-pate’n a kipatna a ngilhkei uh chih i
thei hi. Ahihleh eite leng i pu-leh-pate suan leh pakte ihi ua, amaute
kipatna ei kipatna ahia, huaiziakin i kipatna SINGTANG khua leh
ZOLEI/ZOGAM i ngilh louh ua, i puah ua, i zuun ua, i humbit ding
uh hi lellou ding hiam chi i hi.
0 comments:
Post a Comment