I.TUAILAI: Tuailai i chihte tuh-Naungek ana hi ngeita,naupang chih leng ana pelta,ahihhanga upa nailou,ham nailou tek nailou te ahi.Mihing a dia hun nuam pen-Naupangten tun kal a ngaklah uh,pitek,putek ten ngai mahmah a agen chim theihlouh hun uh ahi.Hiai hun tuh I vanglai,I lutlai leh I hoih pen hun ahi.Theihsiam i sawm ding iki dawm ding kisatheim mai lou in Toupa I lau ding uhi.Hiai hunin hondeih,hon zang nuam leh hawn mu nuam a tam.Kumpi nasem ding-tuailaite ki deih,mimal nasem ding tuailaite ki deih,Politician ten amau a dia pang dia hondeih uhi.I melma pa Setan in ama sepaih muanhuai hi ding a hon zol,I biak Pathian hon bawl tun ana sem ding a hondeih,hon khawiliantu i nu leh pa ten tapa hoih tanu hoih leh suan huai hi ding a hon deih uh,mi nu leh paten makpa ding leh mou ding a hon deih, i khua leh tui, i chi i nam in tunung chianga makai,heutu hi ding a hon deih.I mohpuakna a lian,i poimohna a gol,mawk om mai mai thei ihi kei.Tuailai hun a fel leh kizente mah ahi a pichin chiang ua leng mi zat theihte.Nanga om thilpiak na siamna,na kivakna,na hih theihte amanpha pen a zang ding in inkuan in hon poimoh,khosung,chi leh nam in hon poimoh ahi.
II.NEKTAK ZONNA: Hiai tuh tomchik a gen in nnasep chi leng i gen khelh a gin huaikei.I Laisiangthou ah “Nna sem mi pen nek mutak hi ahi” ( Mat.10:10 I Kor 9:9 ).Tuabanah, “Kuapeuh in nna a sep nop kei leh nek zong ne kei hen” ( II Thess.3:10).Hiaite apan nektak zon tuh nnasep ahi chih a lang chiang mah mah hi.Toupa Pathian in Adam kiangah nek ding thu a pe masa kei a,sep ding a guan masa zaw.Toupa Pathian in pasal api a,Eden huan ah a kem ding leh a veng dingin a koih ta hi. Huan, Toupa Pathian in pasal kiang ah, huan a sing chiteng gahte na utut na ne thei hi” (Gen.2:15-16). Huan kem ding leh veng ding chih Toupan a hilhkhit in huan a sing chiteng gah na utut na ne thei chiin phalna a pe pan hi. Adam in Eden huan a potsan dek in hichibang Toupa thupiak a hong om nawn- “Toupa Pathian in amah a lakkhiakna leilet ding in Eden huan a kipan a sawlkheta hi” (Gen.3:23). Tun zaw mikhial na hi a kon hehpih a semlou in ne in achi tuankei a, a khauh zaw, ahaksa zaw sem ding a sawlkhiakin a om. Pathian in Adam kiangah “na ji thu na man a singkhat agah na ne ding ahikei chi a ka hon thupiak, agah na nek ziakin, leitung nang ziakin hamsiatin a om ta hi; na dam sungteng in gimtak a sem in agah na ne ta ding” (Gen.3:18) chi hi. Hiai tuh tunitan a mihingte nektak zonna dia Adam tungtawn a Toupa thukhun itan khak uh ahi den ta hi. Na tuamtuam, Sep dan tuamtuam om mahleh nek leh dawn a kingakna ding taktak zaw ut dan chiang kia a hunkei a, gimtaka semtute mah in lohchinna atang sek uh ahi.
Nektak zonna na khatpeuh a nuamlua omkei, ahaksa lua leng a om samkei, lungtanga tupna,kipiakna, kuhkalna, chihtakna toh thanuamtaka sep in hon lohchingsak ding hi. Mi a peuh nuam dinga lamet ding ahikei. Nang apen, nang sep pen limbawl inla, huai ah na theihtawp suah in pang lechin nektham, kingakna takin Toupan hon bawlsak thei hi.Buh haute a hatpente ahi tuankei uh- taimataka nitenga kuan, azu aham thuaka, mi in om ni, mi kuanlouh ni a leng kuhkaltaka semte ahi zaw.Nektakzonna ichih a huap alian a, zontheihna leng atam a eikhong theihbatlouh tampi a om lai ding. Nektakzonna chi tampi om mahleh ei septheih leh ei toh kituak banah Khristiante adia leng kilawmte mah telsiam thei leng. Nekzonna chi tampite lak a tamlou enkhawm leng:
1. KHUT NASEP : Hiai tuh mitam zaw thamte nekzonna, pilna siamna nei loute adinga, baihlam pen ahi. Hiai leng a gol mahmah a septheih atam in gen ding atam ding, tuate laka tamlou- Loubawl, huan bawl, Mistiri/Carpentry nasep, siksek, workshop, sammet, puankhui, puan-gat, khauphan, suanggelh, nangphan leh adangdang. Khawpi ah sep ding atam sem a, summuhna leng abaihlam zaw khota sang in, a rate omsa pawl om mahleh a semtuten amau hoihsak banga bawl tawmtheih leng a tam.2. SUMSIN & SUMBUKBAWL : Sum sintheihna chi tampi om in, a sepdan zong atuamtuam om hi. Van zuak, van leh van khentuah a pung om a mi leitawisak chih bang. Hauhsak i ut leh sum sin a sum bawl ding ahi. Ahihhang in, pilvanna ding bel i nasep leh i sum zon sawm dan ah kivel hoih masak ahoih. Mi khitui luanna, mi inkuan subuaitu leh mi hinkhua susetu hihlouh tum thei leng. Pathian leh Saptuam banah khotang deihlouh thilte a sumsinlouh tuh ahoih pen.
3. MIMAL NASEM A KILOHNA : Mi hausaten na ahau ua, semtu tampipi a poimoh uh. Company leh Industry lianpipi neite ngial in mi tamsem poimoh uhi. Laisiamte sep ding, a siamloute sep ding tampi anei uhi. Tulai laisiam mahmah leh akiva deuhte Government tangkha lou in Company ten tang pahpah uhi. Amau loh hoihtak bawlsak ban uah hamphatna tampi pe theilai uhi.Tuatan va tangpha teilou eilawi- mi naudon bang, mi paunsop bang, mi in zut leh inngak bang, mi school a sem bang leh nitha a va kiloh bang ihi uhi. Mihausate pansan a, khosa, amau leng ei a zong kiloh tawmte ziaka na tampi semthei, aki poimoh tuah ihi. Pu neite ipu deihna banga i om a, amau deih banga isep ding tuh i mohpuak ahi.
4. MISSION NASEP : Saptuam teng in semtu a nei chiat, hunbit a sem pawl, casual a sempawl chih bang om hi.Mission nasepna ah achi tuamtuam tampi in kikhenthei hi. Mission field a missionary a sempawl, saptuam omsa kem a Pastor na sempawl, sawltak nasep bang, sinsaktu na leh office a clerk leh a tuamtuam sempawl. Tuailai ten i septheih ding uh na tampi om hi. Recruitment Rule (RR) in a ngiat bang siamna leh chinna i neih nak leh-kipat khiak sawm in panla ni!
5. KUMPI NASEP : Kumpi nasep, hiai tuh miten ingaihsang uh, ilunggulh leh i duhthusam pen uh ahi. Ana atam a semtu ding leng poimawh atam. Siamna sang leh apilte ading, siamna sang neiloute ading leng atam. Himahleh na muh ding pen ahaksa ta, ana sang a a zongtu atam zawk gige ziakin. Siam tuamdeuh leh siam bik bang nei deuh leng a baihlam deuh ding. Tuailaite ading in kumpi nasep ding tam mahmah ahihman in,eilama kisin dingte panlak dingte ah theihtawpsuahin pan nala peuhmah leng.
THUKHITNA : Denchianga inkuan bawl ding, zi leh pasal, ta leh nau nei leng banga vak a, bang a nektak zong ding chih ki sakkholh hun tuh tuailai hun ahi. Tuhun a kisakholsiamte nupi-papi, inkuan a hon bawl ua leng buailou dingte ahi uh. Sepna neikei mahleng sep ding tumta khat tup a neih, laipilna ineihkei leh leng thanuam in taima peuhleng kivaklah lou ding ihi. Mi taima, zu leh sa leh khamtheih hihlou, Pathian laudansiam mite Toupan vualjawl zel hi. “Ngaidih,Toupa mit tuh amah laudansiamte tung ah atu gige a,a chitna lamente tung ah; A hinna uh sihna laka humbit ding leh kialtana amau tung hing ding in” (Sam 33:18-19) A misiangthoute aw Toupa laudansiam un, amah laudan siamte adingin taksapna himhim a omlouh jiakin (Sam 34:9).
DOTNATE APAN NGAIHDAN KIKUPNA
1. Nektakzonna dinmun adingin pan bang na chi laka?
2.Banglama nek zong ding hiin na kithei a?
3. Nang nna non septheih nung na inkuan uah khantouhna om in nathei hia?
4. Nang hahpanna ziaka naneih ngeilouh uh naneih beh bang a om a?
5. Michih, inkuan chih in ipanlak theihna, nektak zonna dia zattheih hoih nasak bang a om a?
LOHCHINNA DINGA ‘C’ NGATE:
1. Character - awmdan
2. Commitment - kipiakna
3. Conviction - Chihtiltelna
4. Courtesy - hoihna
5. Courage - hangsanna
SMART PRINCIPLE : Specific- kichian sinsen ding
Measurable - teh theih hi ding
Attainable - tun zohna mun hi ding
Realistic - a tak tak gam hi ding.
Tangible - khoih/hamphatpih theih hi ding.
CHIMTAK LO DING - Be persistent
KIZEKAISAK LO DING - No procastination
AWL- AWL A HIH DING - Be consistent
“The secret of sucess is consistence” ~ Benjamin Disreali
0 comments:
Post a Comment