Hiai naungek genthei taka a nu’n a paai laiin a pasal toh kikhen uhi. Haksa chiteng lakah Haukapthang hong piangkhia a, sawtlou nung in Pa thak/Padang nei ding dinmun ah ding hi. Naungek Nu kiangah pasal khat in itna thu va kim jel a, ka lungsim tengteng in k’on it a, tua naungek na pomlai leng it ka hi, na nih ua ittak a honkem ding ka hi chi jel hi. Naungek nu’n leng tak simthu sa in sihtanpha a di’ chi in ana kitenpihta hi.
Tua naungek toh a nu-le-pathak Myanmar gam Tuikhal khua ah khosa uhi. Niteng khosak haksat ziakin nekzonna a nopzawk deuh khak leh chi’n Mizoram lamah sum-le-pai zong in pemkhia uhi. Huchiin Kawlbem khua ah mi lou nnasem a kivaak in Kawlbem apan 3 km vel a gamla mi’ loubuk ah nnasem in a innkuan un giak jel uhi. Tua a giahna mun uh gamlak ah naungek in khawvel genthihna mulkim huai taktak thuak den hi. A pa’ itna in zaw sawtdaih hetlou ahi ding, luidung a loubuk a nnasem a giak ahihman un tha it mahmah uhi. Zing khawvak phet chiang in a tapa uh amah kia loubuuk a nusia in nnasep san jel uhi. Gamnuai ah a nute’ omlouh kal in a utna lamlam ah ana bokvak jel hi.
Nitak khat ann ne ding in hong kisa ua, naungek a zon uleh aomna mu zoulou in buai mahmah uhi. A tawp in a nu’ lungkham lua a vakvakna leh buuksak saklam ah tua naungek singbul kiang khat a khe tuap letlat a khut langkhat a lu ah koih a ihmu hithit lai aom va mukhia hi. Khenkhat a di’n lungphawng a sibup theih hial ding dan ahi. Anu’n naungek pen paukam himhim a houpih apa’n phallou bibek hi. Khut vaithoh hiam, action hiam in a pa’n houpih jel hi. Naungek in a pa’ lau mahmah in a kiangah leng om ngam ngeilou hi. Apa’n ganhing bang in soisak mahleh a nu’n a pasal in a vuakkhak ding a lauh jiakin bangmah gen ngam ngeilou hi.
Mi piching gawt a thuak jawhlouh ding khop in naupang soisak in om hi. A nute’n nna a sepsan chiang un amah buuknuai khawng ah ana lum jel hi. Singkung sang pipi khawng ah nauluai dan a sai-ip khai in huai ah taisan ua, sun chiang in singkhuah khawng lemkhawm in puankhuh ua- aknou kep in kem uhi. Mi tampi’n gamlak khawng ah amah kia aom amuh chiang un lai-nat huai sa in naupang gammang hi’n teh chi in awlmoh thei mahmah sek uhi. Himahleh a nu-le-pa’n ngaihsak lou in a utna lamlam ah pai leh himai chihsan lel uhi. Naungek a sun a zan in kapkap sek a, sunkhat a pa’n a soisak khit in buuk kong kalkhum in pawtkhiaksan uhi. Naungek kapging thawm zakha te’n va en dek sek mahle uh kong kikalh ahihmanin lut ngam tuanlou uhi. Mihing kikepdan ding in tuh mulkim huai mahmah mai hi. I ngaihtuah lel in leng khitui pawt thei hi. Naungek biang (cheek) mei-am peuh in biksak jel a, sihna hial a tungah tung le leng poisa hetlou ding bang in khosa hi. A khe leh khut a man in khai kangtou a, tuanglai ah khesuk dup sek hi. Naupangte’n ganhing a soisak ua a thalkhiat dupdup uh bang in naungek tuh a pa’n hih genthei mahmah hi. A khen chiang a pummat in buuk bang khawng denna ek in, buuk nuai bang ah khesuk thep-thup jel hi. Hiai bang soisakna naupang kum nih lel khawng thuak di’n mulkim huai petmah hi. Bangmah lah ahihkhelh aom ngal kei a!!
Nikhat a nu leh pan khual zinsan ua, naungek pen a giahna buuk uah nusia uhi. A gilkial chiang a anek ding chi’n anntang leh singpi koihkhiaksa in koih uhi. Gan ann piakdan toh a kilamdang kei. Naupang kum 2 vel mi’n bangchi’n tua bangte akinek thei mahmah diam ah! Hiai ni’n vangsiat huai takin tunglam meipi vom ngeingoi in honkhuh in sunlai himahleh khuamial ding bang hial hi. Huihhat mahmah ging honhon in nung vutvut a, gial kia in vuah nasatakin ju hi. Hichibang nuai ah naungek amah kia gamlak a buuk sung a om ahi chih ngaihtuah le chin na khitui a luanglou thei kei ding. Hiai bang teng a tungah tung mahleh naungek bangmah chi hetlou in hingsuah hi. A lamdang Pathian in a bitna khut naungek tungah jak ahi chih chiang mahmah hi.
Hichibang thu lamdang hongthang jel in mite lungsim phawng mahmah a, ittu ding neilou naungek sihna khop soisakna ana thuak mualsuah, mi tampite khitui luanna naungek, Pathian apan suak itna tawh ”Naupang si ding ka en ngam kei” chi thei Upa H. Dengthuam leh a innkuante’n nisim 06/06/2005 in a nu-le-pa khut sung pan in va lakhia uhi. Nu Dimching (Upa H. Dengthuam ji) in, “A nu-le-pa kiang ah tua naungek ka ngen ngam zok kei a, a tawp in, Ka naute’n naungek a deih lua ua, na nau uh hon kepkhel phot le ung chi in ka ngen masa” chi hi. “Naungek pa’n buuknuai apan lakhia in hon pe ngal” chi hi. Huchi’n Kawlbem lam manawh in hon paipih vengveng ua, naungek lungnuam kisa in a mel ah kipahna muhtheih in om hi. A hang bel, gamnuai a ganhing bang a khosa ahihman in, amah bangbang naupang kilawm taktak a muh chiang in kipak lou theilou hi. A hehpih huai dan gensiam haksa ka sa hi. Mit mahmah in mu chiat leng ut huai sa ing.
Kawlbem khua ah nisim 12/06/2005 dak 3pm in Upa H. Dengthuam inn ah Pathian kiang a kipahthu genkawm in naungek minphuahna thupitak a neih in om hi. Itna tellou hial a bawl gentheih aom naungek, huihpi vuahpi nuai apan haksa chiteng thuak mualsuah ahihman in, a min kheksak hial in om hi. Khentuam neilou, meithai genthei leh tagahte Pa Van Pathian in ama’ min thupina ding a hiai naungek humbit ahi chih etsakna in JOSEPH LALVENHIMA chih min phuahsak in om hi. Nisim 19/06/2005 (Nipi Ni) in Pastor H. Laithang khut ah naungek Joseph Lalvenhima, Kawlbem EBC Biakinn ah latna thupitak Pathian min a neih in om hi.
Aw Pathian tanga hon panpih,
Machiang ka lam-et uh
Huihpi vuahpi nuai a bitna,
0 comments:
Post a Comment